მოკლედ: "საარჩევნო ადმინისტრაციამ დაამტკიცა 2024 წლის სამოქმედო გეგმა, სადაც არათუ ემიგრანტების არჩევნებში მონაწილეობაზე არ წერია რაიმე, არამედ საზღვარგარეთ მცხოვრები მოქალაქეები ერთხელ არის ნახსენები, ისიც ინფორმაციის გავრცელების ნაწილში", — წერია პარტია გირჩი-მეტი თავისუფლების და დროას განცხადებაში.

  • მათი თქმით, ცესკოს და ქართული ოცნების მიზანია, არჩევნების მიღმა დატოვოს მილიონზე მეტი ადამიანი.

დეტალები: პარტიები მიიჩნევენ, რომ ცესკოს გეგმა ითვალისწინებს ახალი ინფრასტრუქტურის შექმნას, რისთვისაც საარჩევნო კომისია აპირებს სახელმწიფო/ადგილობრივი თვითმმართველობის ორგანოებთან სამუშაო შეხვედრების გამართვას უბნებისთვის შენობების გამოყოფის შესახებ, თუმცა, "არაფერია ნათქვამი საზღვარგარეთის ქვეყნებში დამატებითი საარჩევნო უბნების გახსნაზე, რაც ემიგრანტების არჩევნებში მონაწილეობისთვის არის აუცილებელი", — წერია განცხადებაში.

პარტიები — გირჩი-მეტი თავისუფლება და დროა, პრობლემას ხედავენ იმაშიც, რომ ცესკომ ემიგრანტების საკითხი ბიუჯეტშიც არ გაითვალისწინა, თუმცა, "ცესკოს არ გამორჩა ისეთი საკითხები, როგორებიცაა: საინფორმაციო-სასწავლო ინტერნეტ თამაშის მოდიფიცირება და ცესკოს აპარატის თანამშრომელთა კმაყოფილების კვლევის ჩატარება", — ამბობენ ისინი და აღნიშნავენ, რომ 2024 წლის საბიუჯეტო განაცხადში კადრების მომზადება-გადამზადებისათვის ცესკოს 100.000 ლარი აქვს გაწერილი, ეს თანხა კი, პარტიების მოსაზრებით, "უცხოეთის ქვეყნებში საარჩევნო უბნების გახსნის საჭიროებებს სავსებით არ შეესაბამება".

  • განცხადების მიხედვით, ქვეყნის შიგნით მივლინებისათვის ცესკომ 669,800 ლარი გაიანგარიშა, ხოლო ქვეყნის გარეთ მივლინებისათვის მხოლოდ 160,000, რაც "ნათლად
    მიუთითებს, რომ საარჩევნო ადმინისტრაცია არ გეგმავს უცხოეთის ქვეყნებში საარჩევნო უბნებისათვის აუცილებელი მოქმედებების განხორციელებას".

ბოლო ხაზი: გირჩი-მეტი თავისუფლება და დროა მიმართავს ცესკოს, რომ ამომრჩევლის 1/3-ის არჩევნებში მონაწილეობის გარეშე, 2024 წლის არჩევნები ვერ ჩაითვლება ლეგიტიმურად.

  • "ნაცვლად დესტრუქციისა და საბოტაჟისა, უზრუნველყავით მილიონზე მეტი ქართველის არჩევნებში მონაწილეობა და არჩევნების ლეგიტიმურად ჩატარება", — მიმართავენ ცენტრალურ საარჩევნო კომისიას.