მოკლედ: დემოკრატიის კვლევის ინსტიტუტის (DRI) შეფასებით, ნატა ფერაძის სახლთან ალტ-ინფოს აქციის დროს კიდევ ერთხელ გამოჩნდა სამართალდამცველების განსხვავებული დამოკიდებულება აქციის მოძალადე მონაწილეების მიმართ, რადგან სამართალდამცველებს მათ მიმართ არ გამოუყენებიათ კანონმდებლობით გათვალისწინებული ღონისძიებები.

  • "ეს ადასტურებს ხელისუფლების ლოიალურ პოლიტიკას ექსტრემისტული ჯგუფების მიმართ და ახალისებს შემდგომ ძალადობას", — წერია DRI-ის განცხადებაში.

დეტალები: DRI საპროტესტო აქციების მონაწილეების მიმართ ხელისუფლების შერჩევითი დამოკიდებულების მაგალითად იხსენებს 2023 წლის 2 ივნისის მშვიდობიანი აქციას, როდესაც პოლიციამ სამოქალაქო აქტივისტები, ადვოკატები და არასამთავრობო ორგანიზაციის წარმომადგენლები ცარიელი ფურცლის გამო დააკავა.

  • "ხელისუფლების შერჩევითი დამოკიდებულება საპროტესტო აქციების მონაწილეების მიმართ ახალისებს ძალადობრივი ჯგუფების აგრესიას", — წერს DRI.

ასევე, DRI მოუწოდებს შინაგან საქმეთა სამინისტროს, იმოქმედოს კანონმდებლობის ფარგლებში:

  • დაიწყოს გამოძიება თავდასხმის ფაქტზე და
  • არ დაუშვას ძალადობრივი ექსტრემისტული ჯგუფების საპროტესტო აქციაზე კანონმდებლობით დადგენილი ნორმების დარღვევა.
  • ასეთის არსებობის შემთხვევაში კი, დაუყოვნებლივ აღკვეთოს სამართალდარღვევის ნებისმიერი ფაქტი.

ბოლო ხაზი: გუშინ, 10 იანვარს, ნატა ფერაძის სახლთან პრორუსული, ძალადობრივი მოძრაობა ალტ-ინფომ აქცია გამართა. ისინი სამების ტაძარში მატრონა მოსკოველის ხატისთვის საღებავის შესხმას აპროტესტებენ. ადგილზე მობილიზებული იყო პოლიცია.

  • 6 იანვარს პარტია ევროპული საქართველოს წევრმა, გიორგი კანდელაკმა სამების ტაძარში გადაღებული ვიდეო გამოაქვეყნა, სადაც ჩანს მატრონა მოსკოველის ხატი, რომლის ერთ-ერთ ფრაგმენტზე იოსებ სტალინია გამოსახული.
  • 7 იანვარს საქართველოს პატრიოტთა ალიანსის წევრებმა ირმა ინაშვილმა გამოაქვეყნა ვიდეო, სადაც ამბობს, რომ მატრონა მოსკოველის ხატი, რომელზეც იოსებ სტალინია გამოსახული, სამების საკათედრო ტაძარს "მათ შესწირეს";
  • 9 იანვარს, აქტივისტმა ნატა ფერაძემ თავის სოციალურ ქსელში გამოაქვეყნა ვიდეო, სადაც მატრონა მოსკოველის ხატს ლურჯი საღებავი შეასხეს.