უკვე მესამე წელია თეგეტას თანამშრომლები ზრუნვის კედლის გარშემო ერთიანდებიან და ხანდაზმულებისა და ბავშვების სურვილების ასრულებაზე ზრუნავენ. Tegeta.Care-ის ბენეფიციარებისთვის ჯადოსნური ახალი წლის შექმნა სწორედ მათი მოხალისეობით ხდება შესაძლებელი.

"ზრუნვის კედელი" არის პროექტი, რომელიც ჰოლდინგის წევრებს ზრუნვის იდეის გარშემო აერთიანებს. ნაძვის ხე, წიგნი, ახალი ქურთუკი, სათამაშოები — ეს იმ სურვილების მცირე ჩამონათვალია, რომლებიც, ასრულების შემთხვევაში, წერილების ავტორებს დღესასწაულის ჯადოსნურობის რწმენას უჩენს და მოახლოებული ახალი წლის სიხარულით ავსებს.

ახალ წლამდე წერილები "ზრუნვის კედელზე" თავსდება. წლის მიწურულს კი, თეგეტას თანამშრომლები კედელთან იკრიბებიან, წერილებს ეცნობიან და ბენეფიციართა სურვილებს შესასრულებლად ინაწილებენ. მათ გარკვეული დრო აქვთ იმისთვის, რომ წერილებისთვის განდობილი სურვილები საჩუქრებად, მათი ავტორების ახალი წელი კი, იმედების გამართლების დღესასწაულად აქციონ.

ფოტო: Tegeta

თეგეტა ჰოლდინგის სტრატეგიული კომუნიკაციების დეპარტამენტის ხელმძღვანელმა ამ წამოწყებაზე ვრცლად ისაუბრა.

"ზრუნვის კედელი თეგეტას ერთ-ერთი საყვარელი და გამორჩეული აქტივობაა. ჩვენთვის უკვე ტრადიციად იქცა იმ ადამიანებზე ზრუნვა, რომელთაც ეს ყველაზე მეტად სჭირდებათ. ჰოლდინგის დიდი გუნდი წელს უკვე მესამედ გაერთიანდა ზრუნვის იდეით.

ძალიან ემოციური იყო საჩუქრების შეგროვების პროცესიც და იმის ყურება, როგორი ენთუზიაზმით მოჰქონდათ ჩვენს თანამშრომლებს მათთვის სრულიად უცნობი ადამიანებისთვის განკუთვნილი საახალწლო ფერადი საჩუქრები. ვამაყობთ, რომ ეს ჯადოსნური პროექტი 3 წლის განმავლობაში უკვე 900-მდე ასრულებულ სურვილსა და 1000-ზე მეტ მზრუნველ თანამშრომელს ითვლის", — ამბობს თათია ხორბალაძე.

ბავშვთა ჰოსპისი ციცინათელა, დედების ფონდი, საქართველოს კარიტასის მცირე საოჯახო ტიპის სახლები, ათი მნათი და პირველი სახლი, ჰარმონია, იმედის სახლი — ეს ის ორგანიზაციებია, რომლებიდანაც თეგეტა ჰოლდინგმა წელს საახალწლო სურვილები შეაგროვა. ეს ორგანიზაციები ზრუნავენ მზრუნველობამოკლებულ, სოციალურად დაუცველ, ონკოლოგიური დაავადებებითა და უკურნებელი სენით დაავადებულ ბავშვებზე, მარტო დარჩენილ და მძიმე დაავადებების მქონე ხანდაზმულებზე.

თეგეტას საახალწლო აქტივობაში, ინდივიდუალურად ან თანაგუნდელებთან ერთად, წელს კომპანიის 200-ზე მეტი თანამშრომელი ჩაერთო, რათა ახალ წელს ხანდაზმულები და ბავშვები ახდენილი სურვილების გარეშე არ დარჩენილიყვნენ. პროექტის დასკვნით ეტაპს, საახალწლო საჩუქრების ადრესატებთან მიტანას, თეგეტა თავად უზრუნველყოფს.

თეგეტა ჰოლდინგის შესახებ: უმსხვილესი საავტომობილო კომპანია კავკასიასა და ცენტრალურ აზიაში მომხმარებელს საავტომობილო ეკოსისტემის სრულ სპექტრს სთავაზობს, რაც მსუბუქ, სატვირთო და სამშენებლო, ასევე კომერციულ, სამგზავრო და ინდუსტრიულ ტრანსპორტს მოიცავს. მთელი ქვეყნის მასშტაბით თეგეტას 28 სერვისცენტრი აქვს, ხოლო საერთაშორისო ვაჭრობას ჰოლდინგი ოთხ კონტინენტზე ახორციელებს.

თეგეტა ექსკლუზიურად წარმოადგენს ცნობილ ბრენდებს Porsche, Volvo, Toyota, Mazda. სატვირთო და სპეცტექნიკის მიმართულებით ჰოლდინგის პარტნიორები არიან ისეთი დიდი ბრენდები, როგორებიცაა: MAN, JCB, HINO, Liebherr, BOMAG და სხვები. თეგეტა მსოფლიოს 300-ზე მეტი წამყვანი საავტომობილო ბრენდის უმსხვილესი იმპორტიორია საქართველოში. თეგეტა ჰოლდინგი, 3000-მდე თანამშრომლით, დღეს საქართველოში ერთ-ერთი უმსხვილესი დამსაქმებელია.