მოკლედ: შეიარაღებული პირი, რომელმაც პრაღის ცენტრში მდებარე კარლის უნივერსიტეტში ცეცხლი გახსნა, ფილოსოფიის ფაკულტეტის შენობაში მკვდარი იპოვეს.

  • ინფორმაციას ჩეხეთის პოლიცია ავრცელებს.

დეტალები: თავდასხმის შედეგად, დაიღუპა 15-ზე მეტი, ხოლო დაშავდა სულ მცირე 24 ადამიანი.

ახლომდებარე შენობაში მდებარე რუდოლფინუმის გალერიის დირექტორი, პაველ ნედომა ამბობს, რომ ხედავდა კაცს, რომელიც უნივერსიტეტის აივანზე იდგა და იარაღს ისროდა.

  • პოლიციის განცხადებით, ტერიტორიის ჩხრეკა ამ დრომდე მიმდინარეობს, მათ შორის — აივნის. სამართალდამცველებს სურთ გამორიცხონ შენობაში ასაფეთქებელი მოწყობილობების არსებობა.
  • პრაღის მერის, ბოჰუსლავ სვობოდას თქმით, შენობიდან ყველა ადამიანი გაიყვანეს.

ვინ იყო თავდამსხმელი: მის ვინაობას პოლიცია არ ასახელებს, თუმცა ცნობილია, რომ 24 წლის კაცი ამავე ფაკულტეტის სტუდენტი იყო.

  • ცოტა ხნით ადრე, გარდაცვლილი იპოვეს მისი მამაც.
  • ჩეხეთის შს მინისტრის თქმით, მომხდარი არ უკავშირდება საერთაშორისო ტერორიზმს.

რა გამოხმაურებები მოჰყვა მომხდარს: ჩეხეთის პრემიერ-მინისტრმა პეტრ ფიალამ, ტრაგიკული მოვლენების გამო, ყველა ღონისძიება გააუქმა.

  • ჩეხეთის პრეზიდენტი პეტრ პაველი X-ზე წერს, რომ პრაღაში მომხდარით შოკირებულია და მსხვერპლთა ოჯახებს გულწფელ სამძიმარს უცხადებს.
  • მან, ასევე, მადლობა გადაუხადა პრაღის მოსახლეობას, რომ უსაფრთხოების ძალების ინსტრუქციებს ითვალისწინებენ.

ურსულა ფონ დერ ლაიენი, ევროკომისიის პრეზიდენტი: "შოკირებული ვარ იმით, რასაც დღეს პრაღაში რამდენიმე სიცოცხლე შეეწირა. ღრმა სამძიმარს ვუცხადებ მსხვერპლთა ოჯახებს და სრულიად ჩეხ ხალხს. ჩვენ თქვენს გვერდით ვართ და თქვენთან ერთად ვგლოვობთ."

სალომე ზურაბიშვილი, საქართველოს პრეზიდენტი: "უზომოდ დამწუხრებული ვარ იმ ტრაგიკული მასობრივი სროლის შესახებ, რაც პრაღის ცენტრში მოხდა. ჩემი ფიქრები ახლა მსხვერპლებთან და მათი ოჯახის წევრებთანაა", — წერს X-ზე სალომე ზურაბიშვილი.