ლეგენდარული კანადელი მომღერლის, სელინ დიონის, ჯანმრთელობის გაუარესებულ მდგომარეობაზე მისი და საუბრობს. ფრანგულენოვან გამოცემასთან უახლეს ინტერვიუში კლოდეტ დიონი ამბობს, რომ უიშვიათესი ნევროლოგიური დაავადება, რომლის დიაგნოზიც პოპვარსკვლავს შარშან დაუსვეს, პროგრესირებს.

"სელინი მასთან გამკლავებას ცდილობს, მაგრამ საკუთარ კუნთებს ვეღარ იმორჩილებს", — აღნიშნავს კლოდეტი, — "ყველაზე მეტად გულს ის მტკენს, რომ იგი ყოველთვის ძალიან მოწესრიგებული და შრომისმოყვარე გახლდათ. [...] ეჭვგარეშეა, რომ ჩვენი და მისი ოცნებაც სცენაზე დაბრუნებაა. მაგრამ რა მდგომარეობაში? არ ვიცი. ხმის იოგები კუნთებია, ისევე, როგორც გული".

სელინ დიონმა გასული წლის მიწურულს განაცხადა, რომ გაშეშებული ადამიანის სინდრომი (Stiff Person Syndrome) დაუდგინდა. ეს იშვიათი ნევროლოგიური დაავადება თანდათან პროგრესირებს და იწვევს ტკივილს, კრუნჩხვებს და კუნთოვან გაშეშებას. სინდრომი, რომელიც პირველად 1950-იან წლებში აღიწერა, მილიონში ერთ ადამიანს ემართება. ამის გამო, დაავადებაზე სათანადო სამეცნიერო-კვლევითი სამუშაოები არაა ჩატარებული. ცოდნის ნაკლებობის პრობლემას უსვამს ხაზს კლოდეტიც.

"ძალიან აღმაშფოთებს ეს. რადგან მსგავსი შემთხვევა მილიონში ერთია და ბევრ ადამიანს არ ემართება, მეცნიერებს კარგად გამოკვლეული არც კი აქვთ დაავადება", — ამბობს სელინ დიონის და და დაავადების სიმპტომებსაც მოკლედ აღწერს, — "ხომ იცით, ადამიანებს ძილში ფეხის გაკავების გამო რომ ეღვიძებათ? აი, ოდნავ მაგას ჰგავს, ოღონდ ეს მდგომარეობა ყველა კუნთს ემართება. სელინის დასახმარებლად, მისი ტკივილის შესამსუბუქებლად ცოტა რამის გაკეთება თუ შეგვიძლია".

შარშანდელ განცხადებაში პოპშემსრულებელმა აღნიშნა, რომ კრუნჩხვები ყოველდღიურობაში ბევრ სირთულეს უქმნიდა, უძნელდებოდა სიარული და უწინდებურად სიმღერაც კი. შესაბამისად, გაუქმდა წელს დაგეგმილი ევროპული ტურნე.

55 წლის სელინ დიონი თანამედროვეობის ერთ-ერთ საუკეთესო ვოკალისტად მიიჩნევა. მუსიკოსის კარიერა 1980-იან წლებში დაიწყო, საყოველთაო აღიარება კი მან 1988 წელს მოიპოვა, როცა შვეიცარია წარადგინა ევროვიზიაზე და გაიმარჯვა. დიონი ერთ-ერთი ყველაზე პოპულარული მომღერალიცაა — მსოფლიოში მისი ჩანაწერების 200 მილიონზე მეტი ეგზემპლარია გაყიდული. ამასთან, ჩანაწერების გაყიდვის მაჩვენებლით, იგი ყველა დროის ყველაზე პოპულარულ კანადელ და ფრანგულენოვან შემსრულებლადაც მიიჩნევა.