მოკლედ: ქართული ბრენდის დღის ღონისძიებაზე დათო გორგილაძის საავტორო გადაცემა, გორგილაძის აუტანელი სიმსუბუქე დააჯილდოვეს, როგორც წლის წარმატებული ტელეპროექტი.

  • ეს გადაცემა საზოგადოებრივი მაუწყებლის მენეჯმენტმა დახურა, ისევე, როგორც არხის კიდევ ექვსი სხვა პროგრამა და ასევე, ტელეარხი ტელესკოლა.
  • საზმაუმ, ამის შესახებ, ოფიციალურად, 16 დეკემბერს განაცხადა — ერთი დღის შემდეგ, რაც არხზე გადაცემების დახურვის თაობაზე საზოგადოებამ სხვა მედიასაშუალებებიდან შეიტყო.

ღონისძიებაზე, დათო გორგილაძეს ჯილდო შემოქმედებით გუნდთან ერთად გადასცეს.

რა თქვა გორგილაძემ: "ძალიან დიდი მადლობა ჯილდოსთვის. ცხადია, ვაცნობიერებთ, რომ ოდნავ კომიკური სიტუაციაა, რადგან გადაცემა, რომელიც თქვენ დააჯილდოვეთ, ერთი კვირის წინ [პირველ არხზე] დაიხურა. ერთი თქვენგანი ცდება, მგონი, ვიღაც გვირევს", — თქვა გორგილაძემ და მადლობა გადაუხადა გადაცემის შემოქმედებით გუნდს.

  • "ამ შემთხვევაში არის სიტუაცია, რომელიც შეგვიძლია შევადაროთ მრავალსერიიანი ფილმის ერთ-ერთი ეპიზოდის დასასრულს, სადაც ეპიზოდი წყდება ყველაზე საინტერესო ადგილას და რა მოხდება, კაცმა არ იცის", — მიმართა აუდიტორიას მაუწყებლის ყოფილმა წამყვანმა.

კონტექსტი: საზოგადოებრივი მაუწყებლის მენეჯმენტი ამბობს, თითქოს, გადაცემების დახურვა უკავშირდება საკანონმდებლო ცვლილებას, რომლითაც მაუწყებლების დაფინანსების წესი შეიცვლება 2026 წლიდან.

  • ორგანიზაცია მედიის ადვოკატირების კოალიცია, რომელიც 16 ორგანიზაციის გაერთიანებაა, აცხადებს, რომ "ეს ერთგვარი გაგრძელებაა საზოგადოებრივი მაუწყებლის გარშემო განვითარებული მოვლენებისა, რომელიც კიდევ უფრო აძლიერებს შეფასებას, რომ მაუწყებელი მმართველი პარტიის, ქართული ოცნების, ზეგავლენის ქვეშ არის, ვერ ასრულებს მასზე დაკისრებულ მისიას, იყოს პოლიტიკურად ნეიტრალური, ობიექტური და მიუკერძოებელი მედია, და ის 2024 წლის საპარლამენტო არჩევნებს მოუმზადებელი ხვდება".

გაიგე მეტი: მენეჯმენტმა და ოცნებამ ნაყოფიერი ნიადაგი შექმნეს არხზე ხელისუფლების ჩარევისა და მანიპულაციისთვის — მედიაკოალიციის განცხადება