მოკლედ: დადგინდა იმ მოზარდის ვინაობა, რომელიც კახეთის გზატკეცილზე ძაღლმა გაკაწრა.

როგორც მედიას დაავადებათა კონტროლის ეროვნულ ცენტრში განუცხადეს, არასრულწლოვანს უკვე დაწყებული აქვს ვაქცინაცია, რადგან გაკაწვრის შემდეგ, მშობლებმა შესაბამის ზომებს მიმართეს.

სტრიქონებს შორის: ძაღლი, რომელმაც რამდენიმე დღის წინ მოზარდი დაკაწრა, მოკვდა. მას, ლაბორატორიული შემოწმების შედეგად, ცოფი დაუდასტურდა. ინფორმაცია სურსათის ეროვნულმა სააგენტომ გაავრცელა. უწყებისთვის არ იყო ცნობილი ბავშვის ვინაობა.

///

რა ღონისძიებებს ატარებს სახელმწიფო: სურსათის ეროვნული სააგენტოს ინფორმაციით, კახეთის გზატკეცილზე, კოსმონავტის ძეგლის მიმდებარედ, სადაც ძაღლის ცოფით დაავადების შემთხვევა აღინიშნა, სურსათის ეროვნული სააგენტო, თბილისის მერიის მონიტორინგის სააგენტოსთან ერთად, საკარანტინო ღონისძიებებს ახორციელებს.

"აღნიშნულ ტერიტორიაზე, კანონმდებლობით გათვალისწინებულ საკარანტინო ზონაში, მიმდინარეობს ძაღლების სავალდებულო ვაქცინაცია და მონიტორინგი", — წერია სააგენტოს მიერ გავრცელებულ განცხადებაში.