ცოტა ხნის წინ Variety-ის გადაცემაში Actors on Actors ერთმანეთს მარგო რობი და კილიან მერფი გაესაუბრნენ. ეპიზოდში ამ ორი მსახიობის დაწყვილება შემთხვევითი სულაც არ ყოფილა — მარგო და კილიანი ხომ ბარბისა და ოპენჰაიმერის მთავარი როლების შემსრულებლები არიან, ამ ორი ფილმის პრემიერა კი ამ ზაფხულს ერთსა და იმავე დღეს შედგა.

ინტერვიუში მარგომ კილიანს უთხრა, რომ თურმე ოპენჰაიმერის ერთ-ერთმა პროდიუსერმა დაურეკა და ურჩია, ბარბის პრემიერის თარიღი გადაეწია.

"თქვენმა ერთ-ერთმა პროდიუსერმა, ჩაკ როვენმა, დამირეკა, რადგან სხვა პროექტებზეც ერთად ვმუშაობდით და მითხრა: 'ვფიქრობ, თქვენი პრემიერის თარიღი უნდა გადასწიოთ'. მე კი ვუპასუხე: 'თარიღს არ გადავწევთ. თუ ეგრე გეშინიათ ჩვენი, თარიღი თვითონ გადასწიეთ'. მან მითხრა, ჩვენ თარიღს არ გადავწევთ, უბრალოდ ვფიქრობ, თქვენთვის უკეთესი იქნება გადადებაო. მე კი ვუპასუხე, არაფერსაც არ გადავდებთ-მეთქი!", — იხსენებს მარგო.

მარგოს თქმით, კმაყოფილია, რომ ორივე ფილმის პრემიერა ერთსა და იმავე დღეს შედგა, რადგან თვლის, რომ ბარბი და ოპენჰაიმერი ერთმანეთს შეეფერებიან. მარგოს გაუხარდა, როცა გაიგო, რომ მათი არჩევანი მაყურებელსაც მოეწონა. კილიან მერფიმ კი აღნიშნა, რომ პროექტების ასეთი წარმატება იმან განაპირობა, რომ ბარბიც და ოპენჰაიმერიც კარგი ფილმებია.

მართლაც, კინომოყვარულები მთელი მსოფლიოს ირგვლივ აქტიურად განიხილავდნენ, პირველად რომელ ფილმს ნახავდნენ და ვარდისფერ სამოსს მოირგებდნენ, თუ შავ შარვალ-კოსტიუმს. ეს ფენომენი იმდენად ყოვლისმომცველი აღმოჩნდა, რომ მას "ბარბენჰაიმერი" უწოდეს.

აღსანიშნავია, რომ ბარბი $1,4-მილიარდიანი შემოსავლით Warner Bros-ის ყველა დროის ყველაზე მაღალშემოსავლიანი ფილმი გახდა, ხოლო ოპენჰაიმერი $950-მილიონიანი შემოსავლით — ყველა დროის ყველაზე მაღალშემოსავლიანი ბიოგრაფიული ფილმი.

ამავე თემაზე: