სერიალი The Crown, რომელიც ბრიტანეთის სამეფო ოჯახს ეხება, მაყურებელმა პირველად 2016 წელს იხილა და მალევე შეიყვარა. ამჟამად შოუს ბოლო, მე-6, სეზონის ნაწილი გამოვიდა, მეორე ნაწილს კი კვლავ ველით.

ფინალური სეზონის პირველი ნაწილი პრინცესა დაიანას ცხოვრების ბოლო წლებსა და მის ტრაგიკულ ბედზე გვიყვება, მეორეში კი მისი სიკვდილის შემდგომ მოვლენებსაც ვხედავთ და უკვე გაზრდილი პრინცებიც ჩანან.

უკვე ვიცით, რომ შოუში პრინცი უილიამისა და ქეით მიდლტონის სიყვარულის ისტორიასაც ვიხილავთ და ბოლო ეპიზოდიდან მათი როლების შემსრულებელი მსახიობების ფოტოებიც ვრცელდება.

ფოტო: Netflix

სერიალში ის მომენტიცაა ნაჩვენები, როდესაც უილიამი და ქეითი ერთმანეთს პირველად შეხვდნენ — ისინი ერთ უნივერსიტეტში სწავლობდნენ და როდესაც უნივერსიტეტის მიერ მოწყობილ საქველმოქმედო მოდების ჩვენებაზე ქეითიც გამოვიდა, მან პრინცის ყურადღება მიიქცია. როგორც ჩანს, შოუს ბოლო ეპიზოდები სწორედ უილიამისა და ქეითის ურთიერთობისა და მათი სამეფო ქორწინების შესახებ იქნება.

უილიამის როლს ბოლო სეზონში ედ მაკვეი ირგებს. ვიცით ისიც, რომ ბოლო ეპიზოდებში პრინცი ჩარლზი და კამილაც გამოჩნდებიან. სერიალის ფინალური სეზონის დარჩენილი 6 ეპიზოდის პრემიერა 14 დეკემბერს შედგება.