ნეპალის ხელისუფლებამ ახლახან 35 წლის მაია გურუგისა და 27 წლის სურენდა პანდეის ქორწინება ოფიციალურად დაარეგისტრირა. ეს პირველი შემთხვევაა, როცა ნეპალში ქვიარ წყვილის ქორწინება დარეგისტრირდა, რაც აქტივისტებმა ქვეყანაში LGBTQ თემის უფლებების გამარჯვებად შეაფასეს.

ნეპალის უზენაესმა სასამართლომ 5 თვის წინ გამოსცა დროებითი ბრძანება, რომელიც ქვიარ წყვილებს ქორწინების რეგისტრაციის უფლებას აძლევდა. მაია და სურენდა კი პირველი გეი წყვილი გახდა, რომელმაც ქორწინების ოფიციალური რეგისტრაციის უფლებით ისარგებლა.

"უფლებებისთვის ბრძოლა ადვილი არ არის. ჩვენ ეს შევძელით, რაც მომავალ თაობებს ბრძოლას უფრო გაუმარტივებს", — ამბობს მაია, რომელიც ტრანსგენდერი ქალია, მაგრამ ოფიციალურ დოკუმენტში მამრობითი სქესი უწერია.

ფოტო: BBC

როგორც წყვილმა განაცხადა, ერთობლივი საბანკო ანგარიშის გახნა დიდი ხანია, რაც სურდათ. თუმცა მათი თქმით, ყველაზე დიდი ოცნება ისევ შვილის აყვანაა, რასაც ფინანსურად გაძლიერების შემდეგ აპირებენ.

13 ივლისს ნეპალის დედაქალაქ კატმანდუს რაიონულმა სასამართლომ მაიასა და სურენდის ქორწინება არ დაარეგისტრირა. მიუხედავად უზენაესი სასამართლოს ბრძანებისა, კატმანდუს რაიონული სასამართლო ამტკიცებდა, რომ არ იყვნენ ვალდებულები, ბრძანების მიხედვით ემოქმედათ. თუმცა გასულ ოთხშაბათს ლამჯუნგის სოფელ დორდის მუნიციპალიტეტმა მაიასა და სურენდის ქორწინება დაარეგისტრირა. როგორც სოფლის მუნიციპალიტეტის მთავარმა ადმინისტრაციულმა წარმომადგენელმა განაცხადა, ქორწინების რეგისტრაციის მოწმობა უზენაესი სასამართლოს ბრძანების შესაბამისად გაიცა.

შეგახსენებთ, რომ ამ ეტაპზე ტაივანი ერთადერთი ქვეყანაა აზიაში, რომელშიც გეი წყვილების ქორწინება დაკანონებულია.