ამერიკელი პოპვარსკვლავი P!nk თავის კონცერტებზე 2 000 აკრძალული წიგნის დარიგებას აპირებს. აშშ-ის პენცენტრთან თანამშრომლობით, მუსიკოსი ფლორიდის შტატში წიგნების აკრძალვის ტენდენციას უპირისპირდება.

"ამაზრზენია, როგორ ამოიღეს ოფიციალურმა პირებმა სამიზნეში წიგნები რასიზმზე, ლგბტქ და ფერადკანიანი ავტორების ნაწარმოებები", — აცხადებს მომღერალი, — "ამ ქვეყანაში თანასწორობის მისაღწევად ბევრი ნაბიჯის გადადგმა დაგვჭირდა და პროგრესის უკუქცევა არავის არ უნდა სურდეს".

P!nk, თავისი Trustfall ტურნეს ფარგლებში, მაიამისა და სანრაიზში დაგეგმილ კონცერტებზე მისულ ფანებს იმ წიგნებს დაურიგებს, რომლებიც ამერიკის პენცენტრს აკრძალული წიგნების ნუსხაში აქვს შეტანილი.

"თავადაც აქტიური მკითხველი ვარ და, ამასთან, ორი აქტიური მკითხველის დედა გახლავართ", — აღნიშნავს პოპვარსკვლავი, — "და ვერაფრით წარმომიდგენია, როგორ შეიძლება გადაწყვიტონ თუნდაც ჩემმა მშობლებმა, რა უნდა წაიკითხონ ჩემმა შვილებმა და რა — არა".

აკრძალული წიგნები, რომელთა დარიგებასაც მომღერალი აპირებს, მოიცავს თანამედროვე ამერიკელი პოეტის, ამანდა გორმენის, კრებულს და ნობელიანტი ტონი მორისონის რომანს საყვარელი.

ამერიკის პენცენტრის ცნობით, გასულ წელს წიგნების აკრძალვის შემთხვევების რაოდენობით ფლორიდა ყველა სხვა შტატს უსწრებდა. შარშან ფლორიდის 33 სასკოლო რაიონში წიგნების აკრძალვის 1 400 შემთხვევა აღირიცხა. ორგანიზაციის ხელმძღვანელის, სიუზენ ნოსელის თქმით, ეს "წმინდა წყლის ცენზურაა".

თუმცა, წიგნების აკრძალვის შემთხვევები არც სხვა ამერიკულ შტატებშია იშვიათობა. ქვეყნის ბიბლიოთეკათა ასოციაციის ცნობით, მხოლოდ 2022 წელს ბიბლიოთეკებში სხვადასხვა წიგნისა თუ რესურსის აკრძალვა 1269-ჯერ მოითხოვეს. მოთხოვნა შეეხო 2 571 წიგნს, რომელთა შორისაც ჭარბობდა ლგბტქ და არათეთრკანიანი ავტორების ნამუშევრები, ან ნაწარმოებები ამ თემაზე.

ასევე იხილეთ: