ღორმა, სახელად, კევინ ბეიკონმა, 2-კვირიანი ძებნის შემდეგ, როგორც იქნა, სახლში დაბრუნება გადაწყვიტა. 90-კილოიანი ღორი აშშ-ის შტატ პენსილვანიიდან გაიქცა, რის შემდეგაც მისი მოძებნა როგორც ქალაქის მაცხოვრებლებმა, ასევე, უბრალოდ ცხოველების მოყვარულებმაც დაიწყეს და სოციალური ქსელების გვერდებიც კი შექმნეს.

ღორი სახლიდან ტყეში გაიპარა და გაიქცა, რის შემდეგაც ოჯახმა მისი ძებნა დაიწყო. ღორს სახელი ცნობილი მსახიობ კევინ ბეიკონის გამო დაარქვეს და მის მოსაძებნად სოციალურ ქსელში პოსტი თავად მსახიობმაც გამოაქვეყნა, რითაც ღორის მოძებნას ხელი შეუწყო.

"დააბრუნეთ კევინ ბეიკონი სახლში", — წერდა ბეიკონი.

დროდადრო ადამიანები ვიდეოებსა და ფოტოებს აქვეყნებდნენ იმ ადგილებიდან, სადაც კევინს შენიშნავდნენ და ცდილობდნენ, ხაფანგებითა თუ ღორის საყვარელი სასუსნავებით, დაეჭირათ, რაც საბოლოო ჯამში 2 კვირის შემდეგ წარმატებით დასრულდა. ღორის პატრონმა კი მსახიობი კევინ ბეიკონი მადლიერების ნიშნად მისი მოსახელე ღორის გასაცნობად მიიპატიჟა.