სოფელ ბერშუეთში რუსეთის საოკუპაციო ზოლის გადმოწევაზე საქართველოს მართლმადიდებლური ეკლესიის საპატრიარქო განცხადებას ავრცელებს.

საპატრიარქო მიიჩნევს, რომ საქართველოს მხრიდან ძალისმიერი წინააღმდეგობის გაწევა არ შეიძლება და პრობლემაზე საერთაშორისო ორგანიზაციებმა უნდა იმუშავონ:

"ცნობამ ე.წ. სამხრეთ ოსეთის სასაზღვრო ზოლის გადმოწევის შესახებ აღაშფოთა საქართველოს მოსახლეობა. სამწუხაროდ, უკვე არაერთხელ გავხდით მოწმე მსგავსი ქმედებისა, ვინაიდან ჩვენის მხრიდან ძალისმიერი წინააღმდეგობის გაწევა შეიძლება დიდი პროვოკაციის მიზეზად იქცეს, აუცილებელია საერთაშორისო ორგანიზაციებისა და საქართველოს მეგობარი ქვეყნების ძალისხმევის გააქტიურება, რომ აღნიშნული პროცესი შეჩერდეს და გამოსწორდეს.

შევთხოვთ ღმერთს, დაიცვას ჩვენი ქვეყანა და აღუდგინოს მას თავისი საზღვრები".

რუსმა სამხედროებმა შიდა ქართლში, თბილისი-სენაკი-ლესელიძის მთავარი მაგისტრალიდან 400 მეტრში, დე-ფაქტო სამხრეთ ოსეთის საზღვრის აღმნიშვნელი ახალი ბანერები რამდენიმე დღის წინ აღმართეს.