ჭორვილას შესასვლელთან დაპირისპირებისას "ტვ პირველის" ოპერატორი დაშავდა. On.ge-ს ტელეკომპანიაში განუცხადეს, რომ მათმა ოპერატორმა, ნიკო კოკაიამ, ფეხის არეში მიიღო მცირე დაზიანება.

ვინ დაუპირისპირდა ერთმანეთს: ხმაური და ფიზიკური შეხლა-შემოხლა მოჰყვა მიხეილ სააკაშვილის მხარდამჭერების მცდელობას, ბიძინა ივანიშვილის მშობლიურ სოფელში, ჭორვილაში შესულიყვნენ.

  • ერთიანი ნაციონალური მოძრაობის წევრი, სოფო ჯაფარიძე, რომელიც მიხეილ სააკაშვილის წარმომადგენელია, ყოფილი პრეზიდენტის სხვა მხარდამჭერებთან ერთად, ჭორვილაში დღეს გაემგზავრა.
  • ჯაფარიძე გეგმავდა, თანამოაზრეებთან ერთად "შეეხსენებინა ბიძინა ივანიშვილისთვის, რომ ის ვერ გაექცევა პასუხისმგებლობას".
  • სოფლის შესასვლელთან, ენმ-ის წევრებს დახვდა ადამიანების ჯგუფი, რომელმაც მათ ჭორვილაში შესვლის საშუალება არ მისცა.
  • სიტყვიერი დაპირისპირება ფიზიკურში გადაიზარდა — "ტვ პირველის" ინფორმაციით, აქციის მონაწილეების მისამართით ისროდნენ ქვებს და კვერცხებს. პოლიცია ცდილობს, დაპირისპირებული მხარეები განარიდოს.
  • პირდაპირი ჩართვის დროს დაშავდა ოპერატორი ნიკო კოკაია, რომელსაც ნასროლი ქვა ფეხის არეში მოხვდა.
  • ასევე, სავარაუდოდ, აქციის მონაწილეების მისამართით ნასროლი კვერცხი მოხვდა "ტვ პირველის" ჟურნალისტს, რაც პირდაპირ ეთერში ჩართვისას ჩანს.

ჯერჯერობით, On.ge-ს შსს-ში ვერ გვიდასტურებენ, დააკავეს, ან განარიდეს თუ არა დაპირისპირებაში მონაწილე პირები.