დეტალები: ისრაელი აცხადებს, რომ არ დაბლოკავს ეგვიპტიდან ღაზაში ჰუმანიტარული დახმარების შეტანას.

  • პრემიერ-მინისტრის ადმინისტრაციის მიერ გავრცელებულ განცხადებაში ნათქვამია, რომ არ შეუშლიან ხელს დახმარებას, რომელიც ღაზის სექტორის მოსახლეობისთვის საკვების, წყლისა და მედიკამენტების მიწოდებას ითვალისწინებს.
  • ნეთანიაჰუს ადმინისტრაციის განცხადებაში ნათქვამია, რომ ვიდრე ჰამასს ტყვედ ჰყავს მათი მოქალაქეები, ისრაელის ტერიტორიიდან ღაზაში დახმარება არ შევა.
  • ჯერჯერობით, არ არის ცნობილი, როდის დაიწყება ჰუმანიტარული ტვირთის შეტანა ღაზის სექტორში.
  • რაფას გამშვები პუნქტი, რომელიც ღაზას ეგვიპტესთან აკავშირებს, სრული დატვირთვით მუშაობას ვერ შეძლებს, რადგან, ეგვიპტის ინფორმაციით, ისრაელის მიერ განხორციელებული სარაკეტო იერიშების შედეგად, დაზიანდა.


კონტექსტი: აშშ-ის პრეზიდენტმა ჯო ბაიდენმა, რომელიც დღეს ისრაელში ჩაფრინდა, პრესკონფერენციაზე განაცხადა, რომ პალესტინელებიც ძალიან მძიმე მდგომარეობაში არიან.

  • მისი თქმით, ღაზის მოსახლეობას სჭირდება საკვები, წყალი, მედიკამენტები და თავშესაფრები.

მე ვთხოვე ისრაელის მთავრობას, დათანხმდეს ღაზის მშვიდობიანი მოსახლეობისთვის ჰუმანიტარული ტვირთის შეტანას, რომელიც შემოწმდება და დახმარებას მიიღებს მოსახლეობა და არა ჰამასი

განაცხადა ბაიდენმა.

  • აშშ-ის პრეზიდენტმა თქვა, რომ ისრაელი თანახმა იყო, დახმარება ღაზაში ეგვიპტიდან შესულიყო.
  • "თუ ჰამასი მოიპარავს და მიითვისებს დახმარებას, ეს იქნება კიდევ ერთი დემონსტრირება, რომ მათ პალესტინელი ხალხის კეთილდღეობა არ აღელვებთ," — თქვა მან და აღნიშნა ისიც, რომ ღაზა და დასავლეთ სანაპირო 100 მლნ აშშ დოლარის ჰუმანიტარულ დახმარებას მიიღებენ.