ცნობილ ამერიკელ მომღერალს ალიშა კისს სოციალურ ქსელში გამოქვეყნებული პოსტის გამო დაჯგუფება ჰამასის მხარდაჭერაში ადანაშაულებენ. მუსიკოსმა ინსტაგრამზე მწვანე ჟაკეტში გადაღებული ფოტო გამოაქვეყნა მინაწერით: "რას იზამდით, არაფრის რომ არ გეშინოდეთ? სიმართლე მითხარით... მე პარაპლანით ფრენაზე ვფიქრობ".

ინსტაგრამის ზოგიერთმა მომხმარებელმა ფოტოც და ტექსტიც ჰამასის შეფარულ მხარდაჭერად ჩათვალა. 7 ოქტომბერს, ისრაელზე თავდასხმისას, ჰამასმა სწორედ პარაპლანები გამოიყენა. ამასთან, მომხმარებლების აზრით, ჟაკეტის ფერიც მინიშნება იყო დაჯგუფებაზე, რომლის დროშაც მწვანეა.

კრიტიკის შემდეგ, კისმა პოსტი წაშალა და "სთორიში" მოკლე განმარტება გააკეთა.

"ჩემი გამოქვეყნებული პოსტი არანაირად არ უკავშირდებოდა ბოლოდროინდელ მოვლენებს, რომელსაც უდანაშაულო ადამიანები შეეწირნენ", — დაწერა მომღერალმა, — "გული მტკივა. მე მშვიდობას ვუჭერ მხარს და ამისთვის ვლოცულობ".

კისი მისმა ყოფილმა მენეჯერმა, წარმოშობით ისრაელელმა გაი ოსირიმაც დაიცვა და თავის ინსტაგრამზე მუსიკოსთან ერთად გადაღებული ფოტო გამოაქვეყნა.

"ჩემს ძვირფას მეგობარს, ალიშა კისს, ანტისემიტური პოსტის გამოქვეყნებას მიაწერენ. ჩემს ებრაელ მეგობრებს შემიძლია დავუდასტურო, რომ ეს სიმართლეს არ შეესაბამება", — განაცხადა ოსირიმ, — "ალიშა ყოველთვის იბრძოდა ადამიანის უფლებების დასაცავად".

სხვათა შორის, კისმა 2021 წლის ერთ-ერთ ინტერვიუშიც აღნიშნა, რომ პარაპლანით ფრენა აინტერესებდა.