ვიდეოთამაშ Age of Empires-ში ქართულ ცივილიზაციასა და თამარ მეფეს, როგორც ერთ-ერთ პერსონაჟს, მალე ვიხილავთ. ამ სიახლის შესახებ ინფორმაციას Age of Empires-ის ოფიციალური ვებგვერდი ავრცელებს, სადაც ნათქვამია, რომ ახალ ნაწილში თამაშს საქართველოსა და სომხეთის ცივილიზაციები დაემატა.

თამაშის ახალ ნაწილს The Mountain Royals ჰქვია, რომელშიც ქართველებისა და სომხების სამეფოების გარდა, სპარსეთის ცივილიზაციის განახლებულ ვერსიასაც ვიხილავთ. რაც შეეხება პერსონაჟებს, თამაშს თამარ მეფესთან ერთად თოროს II და ისმაილიც დაემატებიან.

ფოტო: Age of Empires

თამაშის რუკაზე ქართულ ტაძრებსა და ციხეებს ვხედავთ. როგორც აღწერაშია ნათქვამი, კავკასიონის რთული რელიეფი მოთამაშეებს თავიანთ სასარგებლოდ შეუძლიათ გამოიყენონ და მტერთა შემოსევებს გაუმკლავდნენ. გარდა ამისა, Age of Empires-ის ახალი თამაშის წესებში ნახსენებია მონასპა, რომელიც ქართველებს ჰყავთ და განსაკუთრებით ძლიერი მეომრები არიან.

აღსანიშნავია, რომ Age of Empires-ის პირველი თამაში 1997 წელს გამოვიდა, შემდეგ კი ვიდეოთამაშს განსხვავებული ისტორიებითა და ცივილიზაციებით ახალ-ახალი ვერსიებიც ემატება. Age of Empires პოპულარობას დღემდე არ კარგავს და მოთამაშეებს სტრატეგიული თამაშების განახლებებს ხშირად სთავაზობს. რაც შეეხება The Mountain Royals-ის ნაწილს, მისი გამოსვლა 31 ოქტომბერს იგეგმება.