რა მოხდა: სოციალურ ქსელში მოქალაქემ გამოაქვეყნა პოსტი, სადაც წერდა, რომ იმერეთის ერთ-ერთ სკოლაში თანაკლასელები ბავშვს აბულინგებენ და თვითდაზიანების მიყენებას აიძულებენ.

  • მანვე გაასაჯაროა ფოტოც, სადაც მუქარისშემცველი წერილი და ბასრი ნივთი ჩანდა, რომელიც მოსწავლეს გაუგზავნეს.
  • "ჩანთას რომ ალაგებდა, სკოლაში როცა უნდა წასულიყო, უნახავს ფურცელი იმ ტექსტით, რაც ყველამ იცით. მასწავლებლების შეცოდების გამო ბავშვმა საღამომდე დამიმალა ეს ფაქტი... საღამოს სამზარეულოში გაფითრებული მეუბნება ცრემლიანი თვალებით — "დედა, ან სკოლიდან გადამიყვანე, ან მიშველე რამე" და მაწვდის ფურცელს", — განუცხადა ბავშვის დედამ ჟურნალისტებს, კომენტარს რადიო თავისუფლება ავრცელებს.

დეტალები: მომხდარზე შინაგან საქმეთა სამინისტრომ გამოძიება დაიწყო.

  • ფსიქოლოგი მაია ცირამუა წერს, რომ რისკისშემცველია ის ფაქტი, რომ საზოგადოების ნაწილი ცდილობს, გაარკვიოს ვინ არის ბავშვი, რომელმაც წერილი გაგზავნა.
  • "მესმის, შემზარავია, რასაც წერს, გვაბრაზებს და გვაშინებს მისი სისასტიკე, მაგრამ ერთი წამით წარმოიდგინეთ რა მდგომარეობაშია ეს ბავშვი, ასეთი რამ რომ მოაფიქრდა (სავარაუდოდ თავადაც გამოუცდია ის, რასაც თანაკლასელს სთავაზობს — თვითდაზიანებას ვგულისხმობ), მერე წერილი დაწერა და კიდევ უფრო მძიმე მუქარა მოაყოლა. ყველაფერი უნდა გაკეთდეს იმისათვის, რომ გაირკვეს — რატომაა ეს ბავშვი ასეთ მდგომარეობაში და მერე დიდი სამუშაოა ჩასატარებელი, რომ გადარჩეს", — დაწერა ცირამუამ.

განათლების სამინისტროს განცხადებით, პროცესში ჩაერთო ყველა შესაბამისი სტრუქტურული ერთეული, მათ შორის მანდატურის სამსახურის ფსიქოსოციალური მომსახურების ცენტრი და ფსიქოლოგები უკვე მუშაობენ როგორც ბავშვებთან, ასევე მათ მშობლებთან.

  • მათივე ცნობით, სამინისტროს შიდა აუდიტმა უკვე დაიწყო მოკვლევა და სწავლობს სკოლის დირექტორის, ან ადმინისტრაციის სხვა წარმომადგენლების მხრიდან შესაძლო გადაცდომის ფაქტებს.