საქართველოს სახალხო დამცველი, უჩა ნანუაშვილი მიიჩნევს, რომ აზერბაიჯანელი ჟურნალისტის, აფგან მუხტარლის გაუჩინარების საქმის გამოძიება შინაგან საქმეთა სამინისტროს მიერ ეფექტიანი ვერ იქნება. ნანუაშვილის აზრით, ამის მიზეზი ამ საქმეში შსს-ს თანამშრომლების შესაძლო დანაშაულია.

საქართველოს სახალხო დამცველი წინადადებით მიმართავს საქართველოს მთავარ პროკურორს, მისტრალის მიმართ დანაშაულის შესაძლო ჩადენის ფაქტი პროკურატურამ გამოიძიოს. გარდა ამისა, ნანუაშვილი პროკურატურას მოუწოდებს, რომ აფგან მუხთარლის დაზარალებული სტატუსი მიანიჭოს.

"გამოძიების მიმდინარეობის მიმართ საზოგადოების რწმენის განმტკიცებისთვის, მნიშვნელოვანია გამომძიებლებსა და გამოსაძიებელ დაწესებულებას შორის გამოირიცხოს იერარქიული ან/და ინსტიტუციური კავშირები, რაც გარანტირებულია, როგორც საქართველოს კანონმდებლობით, ისე საერთაშორისო დონეზე აღიარებული სტანდარტებით", - აღნიშნავს სახალხო დამცველი.

თბილისიდან 29 მაისს გაუჩინარებული ჟურნალისტი, აფგან მუხტარლი, რომელიც მეორე დღეს ბაქოს ციხეში აღმოჩნდა, ამბობს, რომ ის საქართველოს დედაქალაქიდან კრიმინალური პოლიციის ფორმიანმა პირებმა გაიტაცეს. აზერბაიჯანის ხელისუფლების ინფორმაციით, მუხტარლი საზღვრის უკანონო კვეთის გამო დააკავეს და მას უკვე შეეფარდა სამთვიანი წინასწარი პატიმრობა.