რა მოხდა: 29 აგვისტოს, დნიპროს ერთ-ერთ რაიონში სამართალდამცველებმა საგზაო მოძრაობის წესების დარღვევის გამო ავტომობილი გააჩერეს, რომელშიც მოკლული ჯუმბერ სილოგავა თანმხლებ ქალთან და არასრულწლოვანებთან ერთად იმყოფებოდა.

  • უკრაინის გენერალური პროკურატურის ინფორმაციით, მძღოლი და მგზავრები არ დაემორჩილნენ პოლიციელების მოთხოვნას და მანქანიდან გადასვლაზე უარი განაცხადეს, რის შემდეგაც სამართალდამცველებმა ავტომობილიდან მათი ძალით გადაყვანა დაიწყეს.
  • ამავე დღეს ტელეგრამზე გავრცელებულ ვიდეოში ჩანს, რომ მგზავრები პოლიციას მართლაც უწევენ წინააღმდეგობას, შემდეგ კი 3 გასროლის ხმა ისმის და კაცი ძირს ეცემა.
  • პროკურატურის განცხადებაში ნათქვამია, რომ სილოგავას პოლიციელმა ზურგიდან ესროლა, რის გამოც ის ადგილზე გარდაიცვალა.
  • საქმეზე გამოძიება განზრახ მკვლელობისა და სამსახურებრივი უფლებამოსილების გადამეტების ფაქტებზე (უკრაინის სსკ-ის 115-ე მუხლის 1-ლი ნაწილი, 365-ე მუხლის მე-3 ნაწილი) მიმდინარეობს.

დეტალები: პოლიციელები აცხადებენ, რომ მძღოლი, რომელიც საგზაო მოძრაობის წესების დარღვევის გამო გააჩერეს, აგრესიულად იქცეოდა და "ალკოჰოლური ინტოქსიკაციის" ნიშნებს ავლენდა.

  • დნიპროს მერი, ბორის ფილატოვი ამბობს, რომ ის მხარს უჭერს სამართალდამცველების ქმედებებს.
  • "არავის და არასდროს აქვს უფლება, შეურაცხყოს ან ხელი აღმართოს ფორმიან ადამიანზე, რომელიც თავის სამსახურებრივ მოვალეობას ასრულებს", — დაწერა მან.
  • ფილატოვმა პირობა დადო, რომ დნიპროს ქალაქის ხელისუფლება სრულ მორალურ მხარდაჭერას გაუწევს შემთხვევის ადგილზე მყოფ პატრულებს, მათ ნათესავებსა და კოლეგებს.
  • გამოძიების სახელმწიფო ბიუროში აცხადებენ, რომ სამართალდამცავების მიერ სამსახურებრივი იარაღის გამოყენების კანონიერებას იკვლევენ.