Burger King-ის წინააღმდეგ აშშ-ს სასამართლოში ჯგუფური სარჩელი შეიტანეს. Burger King-ის მომხმარებლები სწრაფი კვების რესტორანს ბურგერის ზომის გამო უჩივიან. კერძოდ, მოსარჩელეთა მტკიცებით, Burger King-ის მენიუს ფოტოსთან შედარებით Whopper ბურგერის ზომა რეალურად 35%-ით მცირეა.

Burger King ბრალდებებს უარყოფს და აცხადებს, რომ მოსარჩელეების მიერ გამოთქმული პრეტენზიები მცდარია. სწრაფი კვების რესტორნის მტკიცებით, არ მოეთხოვებათ, რომ მომხმარებლებს ზუსტად ისეთი ბურგერებით გაუმასპინძლდნენ, როგორებიც მენიუს ფოტოსა და რეკლამებშია ნაჩვენები.

"ცეცხლზე შემწვარი ხორცი, რომლებიც ჩვენს რეკლამაშია ნაჩვენები, ზუსტად იგივე ხორცია, რომლებსაც მთელი ქვეყნის მასშტაბით მილიონობით Whopper ბურგერის მომზადებისთვის იყენებენ", — განაცხადა Burger King-ის წარმომადგენელმა და უარყო ის ბრალდება, რომლის მიხედვითაც, სატელევიზიო რეკლამას მომხმარებელი შეცდომაში შეჰყავს.

მოსამართლე როი ალტმანმა განაცხადა, რომ Burger King-ის წინააღმდეგ დავა ნაფიცი მსაჯულების დახმარებით გადაწყდება. თუმცა მოსამართლემ ის ბრალდებაც უარყო, რომ Burger King-ს სატელევიზიო რეკლამების მეშვეობით მომხმარებელი შეცდომაში შეჰყავს.