2 ივლისს, ელიავას ბაზრობის ტერიტორიაზე საბურავებისა და ავტონაწილების მაღაზიების დაწვით რა ზიანი მიადგა გარემოს და რა დოზით დაბინძურდა ჰაერი, უცნობია. ყველაზე ახლო სადგური, სადაც ჰაერს სინჯები 24 საათის განმავლობაში უტარდება, წერეთლის 103 ნომერშია. აღნიშნული ტერიტორია ხანძრის ეპიცენტრიდან ასეული მეტრითაა დაშორებული.

ავტომობილის საბურავები, ნაწილები, ზეთები და სხვა ტოქსიკური შენაერთების შემცველი პროდუქციით სავსე მაღაზიები ელიავას ბაზრობაზე რამდენიმე საათის განმავლობაში იწვოდა. სქელი, შავი კვამლი, რომლის სიმაღლეც ათეულობით მეტრს აღწევდა, თბილისის გარეუბნებიდანაც იყო შესამჩნევი. ელიავას ბაზრობის მიმდებარე ტერიტორია მჭიდროდ დასახლებულ უბანია. როგორც იქ მცხოვრებნი ამბობენ, მძაფრი სუნი სახლებსა და მიმდებარე ტერიტორიაზე რამდენიმე საათის განმავლობაში იყო. ხანძრის შედეგეგად გამოწვეული კვამლის მასშტაბები ადვილად შესამჩნევია თუნდაც ქვემოთ მოცემულ ვიდეოზე.

On.ge დაინტერესდა, რა ზიანი მიადგა გარემოს და რა დოზით დაბინძურდა ჰაერი 2 ივლისის ხანძრის შედეგად.

გარემოს დაბინძურების მონიტორინგის სამსახურის უფროსმა, მარინა არაბულმა On.ge-ს უთხრა, რომ წერეთლის გამზირზე არსებულ სადგურზე ჰაერის სინჯებში ცვლილება არ დაფიქსირებულა. მისი თქმით, ჰაერის დაბინძურება დამოკიდებულია ცეცხლის ალის სიმაღლეზე, ქარის სიჩქარესა და მიმართულებაზე:

"ხანძრის დროს რომ გაგვეზომა, შემიძლია ახლავე გითხრათ, რომ იქნებოდა ნახშირჟანგი და ის მყარი ნაწილაკები, რომელსაც თქვენ თვალით ჭვარტლის სახით ხედავთ. რამდენად შეიცავს ის ტოქსიკურ ნივთიერებებს, ასეთი სპეციფიური კვლევები ჩვენთან, ზოგადად, ხანძრის დროს არ ტარდება".

რამდენიმე კვირის წინ, ლონდონში 24-სართულიანი საცხოვრებელი სახლი დაიწვა. ხანძარს ათეულობით ადამიანი ემსხვერპლა. აღნიშნული სახლი რამდენიმე საათის განმავლობაში იწვოდა. ხანძრიდან მალევე, ლონდონის მთავრობამ მიმდებარე ტერიტორიაზე მცხოვრები მოსახლეობა გააფრთხილა, რომ ხანძრისას დაიწვა ტოქსიკური ნივთიერებების, მათ შორის აზბესტის შემცველი სამშენებლო მასალები და შესაძლოა, მან დააზიანოს ადამიანთა ჯანმრთელობა. მთავრობამ მოუწოდა მოსახლეობას, რომ კვამლის ყლაპვით გამოწვეული სიმპტომების შემთხვევაში მიმართონ სამედიცინო დაწესებულებებს.

სტუდია მონიტორმა 2015 წელს გამოიძია, რომ საქართველოში იმპორტირებული ავტონაწილების დიდი ნაწილი შეიცავს აზბესტს და პროდუქციაში მის შემცველობას არავინ აკონტროლებს. აზბესტის ნაწილაკები მტვერის სახით ორგანიზმში მოხვედრის შემდეგ, წლების განმავლობაში მძიმე შედეგებს იწვევს, მათ შორის სიმსივნეს.