სტიქია რაჭაში, შოვში, სასტუმრო სანსეტ შოვის მიმდებარედ, 3 აგვისტოს მოხდა.

  • ოფიციალური ინფორმაციით, მეწყრის ჩამოწოლას 33 ადამიანი ემსხვერპლა.

შსს-ის განცხადებით, ამ დროისთვის 29 მათგანის ცხედარია ნაპოვნი, 4 დაკარგულის სამძებრო სამუშაოები კი გრძელდება.

  • უწყების ცნობით, სამუშაოებში ჩართულია ცოცხალი ძალა, მძიმე ტექნიკა, მცურავი საშუალებები და კინოლოგთა ჯგუფი.

ონის მერის მოადგილე, ლევან შერაზადაშვილი ამბობს, რომ სტიქიის ზონა სრულად გადამოწმებულია.

  • "სტიქიის ზონაში, შემიძლია დაგიდასტუროთ, რომ არ არის დარჩენილი კვადრატული მეტრი, რომ არ იქნას გადამუშავებული", — თქვა მან.
  • მისივე ინფორმაციით, მოქალაქეთა თხოვნით გარკვეულ ადგილებზე მიწის მასა ხელახლა მოწმდება.
  • "ასევე, სამძებრო სამუშაოები აქტიურად მიმდინარეობს, როგორც მდინარე ჭანჭახის, ასევე მდინარე რიონის კალაპოტში. მიმდინარეობს კუნძულების დამუშავება, კალაპოტის ფორმირება", — უთხრა შერაზადაშვილმა ჟურნალისტებს.

18 აგვისტოს პროკურატურამ პარტნიორობა ადამიანის უფლებებისთვის (PHR-ის) მოთხოვნა დააკმაყოფილა და სტიქიის ზონაში გარდაცვლილი დავით ბერიაშვილის დედა დაზარალებულის უფლებამონაცვლედ ცნო.

  • პროკურატურამ უარი თქვა PHR-ის მოთხოვნაზე, რომელიც ეხებოდა გამოძიების მიზნით, სისხლის სამართლის საქმის პროკურატურისთვის გადაცემას.
  • "აღნიშნული გადაწყვეტილებით, პროკურატურამ დაადგინა, რომ დავით ბერიაშვლის გარდაცვალება დანაშაულის შედეგია. PHR აგრძელებს დაზარალებულის უფლებამონაცვლის ინტერესების დაცვას და საზოგადოებას მიაწვდის სიახლეებს საქმის განვითარებასთან დაკავშირებით", — აცხადებენ ორგანიზაციაში.