თუკი თავისუფალი დრო სერიალების ყურებაში გაგყავს ხოლმე და, ამასთან, ავტომოყვარულიც ხარ, სწორ ადგილას მოხვდი — ამ სტატიაში იმ ცნობილ მანქანებზე ვისაუბრებთ, რომლებსაც პოპულარულ სატელევიზიო შოუებსა და ანიმაციურ სერიალებში შევხვედრილვართ. შეიძლება დაჰკვირვებიხარ კიდეც — სერიალებში ავტომობილი ზოგჯერ, უბრალოდ, გადაადგილების საშუალება კი არაა, სიუჟეტისთვის საკვანძო ნაწილსაც წარმოადგენს ხოლმე. ასე რომ, აუცილებელიც იყო, ასეთი მანქანებისთვის ერთად მოგვეყარა თავი.

1. ფურგონი The Mystery Machine (სკუბი-დუ)

თუ ბავშვობაში შენი საყვარელი ანიმაციური სერიალი სკუბი-დუ იყო, აუცილებლად გაგიჩნდებოდა სურვილი, მთავარ გმირებს ფურგონით დამგზავრებოდი. ფურგონი, სახელად The Mystery Machine ("იდუმალი მანქანა") ხომ თავბრუდამხვევ თავგადასავლებთან ასოცირდება. ეს ფერადი ტრანსპორტი კი პერსონაჟებისთვის მხოლოდ გადაადგილების საშუალება არ ყოფილა — ის უსაფრთხო ადგილიც, ერთგვარი თავშესაფარი იყო, რომელიც ყოველთვის დაგჭირდება, თუკი გზად ურჩხულებს აწყდები ხოლმე.

2. Metallicar (ზებუნებრივი)

შევროლეს ფირმის ამ მანქანას, რომელიც 1967 წლის გამოშვებაა, 2000-იანების ერთ-ერთი ყველაზე ცნობილი ფენტეზი სერიალის მოყვარულები კარგად იცნობენ. ავტომობილით, მეტსახელით Metallicar, სემ და დინ ვინჩესტერები ბოროტ ძალებს წლების განმავლობაში დასდევდნენ. მანქანას სერიალის ლამის ყველა ეპიზოდში ვხედავთ, ამიტომ, შეგის და სკუბი-დუს ფურგონისა არ იყოს, ისიც უსაფრთხოებასთან ასოცირდება. აი, მეტსახელს რაც შეეხება, თუ გაიხსენებ, რომელი ჟანრის მუსიკას უსმენდნენ ძმები ავტომობილში ყველაზე ხშირად, მიხვდები, რატომ შეარქვეს სერიალის ფანებმა ასე.

3. 2004 Pontiac Aztek (მძიმე დანაშაული)

AMC-ის საკულტო სერიალში ეს მანქანა ერთ-ერთ მთავარ ანტაგონისტს, უოლტერ უაითს, ჰყავს. ბრაიან კრენსტონის განსახიერებული პერსონაჟისადმი, რა თქმა უნდა, ყველანი უარყოფითად ვიყავით განწყობილები, მაგრამ შეუძლებელია, ამ ავტომობილმა მაყურებლის ყურადღება არ მიიქციოს. მართალია, ვიზუალით მაინცდამაინც ვერ დაიკვეხნის, მაგრამ სერიალის ფანები ხშირად აღნიშნავენ, რომ ეს მანქანა, ერთგვარად, უოლტერის ცხოვრებისეული გამოცდილების მეტაფორაცაა; Pontiac Aztek ხომ 2000-იანების ერთ-ერთი ყველაზე წარუმატებელი გამოშვება იყო, რადგან არც ლამაზი გახლდათ და დიდად — არც კომფორტული. თუმცა, როგორც იტყვიან, "თავის საქმეს აკეთებდა".

4. ბეტმობილი (ბეტმენი)

შეუძლებელია, ბეტმენზე საუბრობდე და მისი ლეგენდარული ავტომობილი არ ახსენო. ალბათ ისიც დაუჯერებელია, ბეტმენის ფანი იყო და ბეტმობილის ქონაზე არ ოცნებობდე. ამ გამოგონილ მანქანას ხომ ყველაფერი ჰქონდა, რაც გოთემის ბოროტმოქმედებთან საბრძოლველადაა საჭირო — შეეძლო წარმოუდგენელი სიჩქარით გადაადგილება, ტრიუკების შესრულება, ნებისმიერი წინაღობის გარღვევა და ცეცხლის გახსნაც კი. და, მერე რა, რომ უკვე ათწლეულები გავიდა, რაც ბეტმობილი პოპკულტურაში გამოჩნდა — ეს მანქანა დღემდე ფანტასტიკის სფეროში რჩება.

5. ნავმობილი (სპანჯბობი)

აი, კიდევ ერთ ფანტასტიკურ მანქანას მივადექით, რომლის ამ სიაში გამოტოვება არაფრით იქნებოდა. სპანჯბობზე ხომ ერთ-ერთი პირველი ის გვახსენდება, როგორ წარუმატებლად ცდილობდა, გამოცდა ჩაებარებინა და მართვის მოწმობა მიეღო. თუმცა, ამ პერსონაჟმა ხომ ისიც გვასწავლა, რომ ხელი არასდროს ჩავიქნიოთ და მიზნისკენ სწრაფვა არ შევწყვიტოთ — ჰოდა, ზუსტად ამას განასახიერებს ნავმობილიც; მერე რა, თუ ბეტმობილივით ჩქარი ან სკუბი-დუს ფურგონივით ლამაზი არაა!

რომელი მანქანაც უნდა იყოს — იქნება ეს უოლტერის შეუხედავი Pontiac Aztek თუ ვინჩესტერების ძველისძველი Metallicar — ყველა მათგანს სჭირდება მოვლა, სათანადო დროისა და ყურადღების დათმობა.

სწორედ ამისთვის არსებობს ავტომომსახურების ქართული სერვისი ვუვლი, რომელიც საშუალებას გაძლევს, საჭიროების შემთხვევაში ავტოექსპერტი დისტანციურად გამოიძახო და მანქანის შეკეთებაზე ზრუნვაც მას გადააბარო. ეს ციფრული პლატფორმა შენი მანქანის ყველა საჭიროებას ერთ სივრცეში უყრის თავს და სწრაფ, ხარისხიან და სანდო მომსახურებას გთავაზობს.