ამერიკელ მსახიობ ანგუს კლაუდს გარდაცვალებამდე სამ სხვადასხვა ფილმზე მუშაობა დაუსრულებია. მათგან ორის სახელი ცნობილია — თრილერი Your Lucky Day და კაპიტანი მარველის შემქმნელების ახალი ფილმი Freaky Tales.

"ამ საშინელი ამბით შეძრულები ვართ", — ამბობენ Freaky Tales-ის რეჟისორები რაიან ფლეკი და ანა ბოდენი, — "ანგუსმა გადასაღებ მოედანზე საოცარი ენერგია და სიხალისე შემოიტანა. იგი მხიარულ, ნებისყოფიან, სიცოცხლით სავსე ადამიანად და საიმედო თანამშრომლად დაგვამახსოვრდება. გაგვიმართლა, რომ მასთან მუშაობის შესაძლებლობა მოგვეცა. გულისმომკვლელი დანაკარგია. დიდი ხანი არაა, რაც ვიცნობდით, მაგრამ ძალიან მოგვენატრება".

ჯერჯერობით უცნობია, როდის იხილავს კლაუდის უკანასკნელ ნამუშევრებს მაყურებელი.

კლაუდი მეგობართან და Euphoria-ში მასთან ერთად მონაწილე ზენდეიასთან ერთად.

ფოტო: Matt Winkelmeyer / VF22 / WireImage / Getty Images

ანგუს კლაუდი 31 ივლისს, 25 წლის ასაკში გარდაიცვალა. მსახიობის გარდაცვალების მიზეზი ამ დროისთვის უცნობია. ოჯახის ცნობით, კლაუდმა ცოტა ხნის წინ მამა დაკარგა, რაც ძალიან განიცადა.

"ანგუსი ღიად საუბრობდა მენტალურ ჯანმრთელობასთან დაკავშირებულ პრობლემებზე", — წერს ოჯახი, — "იმედი გვაქვს, მისი გარდაცვალება სხვებს შეახსენებს, რომ მარტონი არ არიან და ამ ყველაფერს დამოუკიდებლად და ჩუმად არ უნდა ებრძოლონ".

კლაუდი მსოფლიომ HBO-ის პოპულარულ სერიალ Euphoria-ში მონაწილეობით გაიცნო. ემის მფლობელ შოუში მსახიობმა ნარკოტიკებით მოვაჭრე პერსონაჟი, ფეზკო, განასახიერა და სერიალის ფანებს თავი განსაკუთრებით დაამახსოვრა. ფილმებში შესრულებული ეპიზოდური როლების გარდა, ანგუსს უთამაშია ვიდეოკლიპებშიც.