სკოლის არდადეგები ნელ-ნელა დასასრულს უახლოვდება. თუმცა, ჯერ კიდევ არის დრო, რომ ზაფხულის საკითხავებს ჩავუჯდეთ, ჩვენთვის საყვარელ წიგნებს თვალი გადავავლოთ ან სულაც ახალი ავტორები თუ პერსონაჟები აღმოვაჩინოთ.

წიგნების საკითხავად, არაფორმალურ და ფორმალურ საგანმანათლებლო რესურსებზე ხელმისაწვდომობის გასაზრდელად კი გამორჩეული ადგილი საქართველოს ბანკის იდეათეკაა — მულტიფუნქციური განათლების სივრცე რეგიონის სკოლებში, რომელიც თითოეულ ლოკაციაზე მოსწავლეებს აძლევს წვდომას 1500-მდე წიგნსა და საგანმანათლებლო რესურსზე, სამეცნიერო და მხატვრულ ლიტერატურაზე, კომპიუტერებზე, პროექტორებსა და შემეცნებისთვის საჭირო ინსტრუმენტებზე.

საქართველოს ბანკის ინიციატივით, დღეს იდეათეკა ქვეყნის მასშტაბით 6 რეგიონის 16 სკოლაში ფუნქციონირებს, უმეტესობა კი საზღვრისპირა და ეთნიკური უმცირესობებით დასახლებულ სოფლებშია განთავსებული. შედეგად, 7000-მდე მოსწავლეს უკვე აქვს წვდომა ფორმალური და არაფორმალური განათლების მიღებისთვის საჭირო რესურსებზე.

სანამ სკოლებში არდადეგებია, იდეათეკის ხშირი სტუმრები, რომლებიც გაკვეთილების შემდეგ და შესვენებებზე დროის დიდ ნაწილს იდეათეკაში ატარებენ, მათი საყვარელი წიგნების შესახებ საუბრობენ.

იდეათეკის მკითხველთა შორისაა გვანცა დიღმელიშვილიც, რომელიც თავის საყვარელ წიგნების შესახებ მოგიყვებათ.

"სანამ თანატოლებისთვის გასაზიარებელ წიგნებს გამოვარჩევდი რამდენჯერმე გადავავლე თვალი ჩემს პატარა ბიბლიოთეკას. არჩევანის გაკეთება ძალიან გამიჭირდა, რადგან ყველა წიგნი თავისებურად მიყვარს და ჩემთვის თითოეული მათგანი გამორჩეული და ღირებულია განსხვავებული სიუჟეტისა თუ შინაარსის გამო. დიდხანს ვფიქრობდი, რა კრიტერიუმებით შემერჩია, თუმცა, მრავალი წარუმატებელი მცდელობის შემდეგ გადავწყვიტე, ის წიგნები ამომერჩია, რომლებიც ზაფხულთან ასოცირდებოდა. ასეთიც ბევრი იყო, მაგრამ როგორღაც შევძელი და გამოვარჩიე ორი წიგნი, რომლებიც განსაკუთრებით მომწონს. მინდა რომ ისინი თქვენც გაგიზიაროთ":

სარა პენიპეკერი — პაქსი

"სარა პენიპეკერი წიგნში — პაქსი ერთ-ერთ ყველაზე თბილ და გულისამაჩუყებელ ამბავს გვიყვება, რაც კი წამიკითხავს. ემოციების კორიანტელთან ერთად, სიუჟეტი ბევრ რამეზე გვაფიქრებს: ომის სისასტიკესა და ნამდვილ მეგობრობაზე. ეს წიგნი არის მათთვის, ვისაც უყვარს ბუნება და ფიქრობს, რომ ნებისმიერ სულიერს გააჩნია გრძნობები.

აქ შეხვდებით ალაპარაკებულ ბუნებას და მათ განცდებს, რომელიც გულგრილს არავის დაგტოვებთ. წიგნის მთავარი პერსონაჟები მელია პაქსი და მისი პატრონი პეტერი არიან, რომლებიც ერთმანეთს დააშორეს, ახლა კი ერთმანეთის საპოვნელად უამრავი დაბრკოლების გადალახვა უწევთ. აქვე გეტყვით, რომ წიგნის ცრემლების გარეშე წაკითხვა ძალიან გაგიჭირდებათ".

ასტრიდ ლინდგრენდი — ჩვენც სალტკროკელები ვართ

"ბევრი ჩვენგანისთვის უსაყვარლესი მწერლის ასტრიდ ლინდგრენის ნაწარმოები — ჩვენც სალტკროკელები ვართ თქვენი ზაფხულის ცხელ დღეებს უფრო მეტ ხალისს შესძენს და გართობისთვისაც ბევრი ახალი იდეის ინსპირაცია გახდება.

ვფიქრობ, რომ ეს წიგნი ნებისმიერი ჟანრის მოყვარულისთვის საინტერესო იქნება, რადგან მისი კითხვის დროს მოწყენის დრო არ გექნებათ. ამბავი მამასა და ოთხ შვილზე მოგვითხრობს, რომლებიც დასასვენებლად სალტკროკიის კუნძულზე წავლენ და მალევე იქაურ ბავშვებს დაუმეგობრდებიან, რის შემდეგაც უამრავი სახალისო და სახიფათო თავგადასავალი ელით. წიგნის დაწყებისთანავე მივხვდი რომ წინ უამრავი გიჟური ამბავი მელოდა. ასეც მოხდა".

საქართველოს ბანკის იდეათეკის ხშირი სტუმრების რეკომენდაციები ზაფხულში საკითხავი წიგნების შესახებ ამით არ სრულდება, ისინი საკუთარ თანატოლებს კიდევ უფრო მეტი საინტერესო ავტორებისა და პერსონაჟების გაცნობას ჰპირდებიან. საქართველოს ბანკი კი არ ჩერდება და განათლების შესაძლებლობების შექმნას აქტიურ რეჟიმში აგრძელებს.

საქართველოს ბანკის იდეათეკების შესახებ საინტერესო ინფორმაციის მისაღებად ეწვიეთ ბმულს.