დეტალები: 13 ივლისს, ბათუმში ტელეკომპანია ფორმულას ჟურნალისტზე, სალომე ბოკუჩავაზე იძალადეს და პროფესიულ საქმიანობაში ხელი შეუშალეს.

  • ფორმულას ინფორმაციით, შემთხვევა მაშინ მოხდა, როცა ჟურნალისტი სიუჟეტის მოსამზადებლად არასრულწლოვანი შვილის გაუპატიურებაში ბრალდებული კაცის ოჯახში მივიდა.
  • "ქალმა რამდენჯერმე დაარტყა ხელი თავსა და სახეში, ასევე, მიაჯახა კედელს და ხელს უშლიდა პროფესიული საქმიანობის განხორციელებაში", — ამბობენ ტელეკომპანიაში.
  • პროკურატურის განცხადებით, პროფესიულ საქმიანობაში უკანონოდ ხელის შეშლისა და ძალადობის ფაქტზე ერთ პირს ბრალდება უკვე წარედგინა.

რა მოხდა: 13 წლის შვილის გაუპატიურების ბრალდებით ბათუმში კაცი 12 ივლისს დააკავეს.

  • გუშინ მას პატიმრობა შეეფარდა.
  • დანაშაული 15-დან 20 წლამდე ან უვადო პატიმრობას ითვალისწინებს.
  • "პროკურატურა მოუწოდებს მედიას და საზოგადოებას გაითვალისწინონ საკითხის სენსიტიურობა და არამარტო აღნიშნულ საქმეზე, არამედ ყველა მსგავსი კატეგორიის საქმეზე, არასრულწლოვნის საუკეთესო ინტერესების გათვალისწინებით, თავი შეიკავონ დაზარალებულის პერსონალური მონაცემების და საქმის დეტალების გამჟღავნებისგან, რათა არ მოხდეს არასრულწლოვნის ინტერესების შელახვა და დამატებითი ფსიქოლოგიური ზიანის მიყენება", — აცხადებენ სამართალდამცავ უწყებაში.