აშშ-ში, კალიფორნიის შტატში, სანტა-კრუსის სანაპიროზე დამსვენებლებს ბოლო რამდენიმე კვირაა, ერთი პატარა და ფუმფულა არსება შიშის ზარს სცემს. ეს, რა თქმა უნდა, ხუმრობით — თუმცა, ქურდბაცაცა წავმა სერფერები მაინც იმდენად შეაწუხა, რომ ცოტა ხნის წინ მასზე ძებნაც კი გამოცხადდა.

ზღვის სამხრეთულ წავს, სახელად 841-ს (აკვარიუმიდან ღია წყლებში გაშვებულ წავებს სახელებად ნომრები ენიჭებათ), აშშ-ის გარემოს დაცვის სამსახური უკვე მთელი კვირაა, ეძებს. 841-ის მიტყუებას სამსახურის თანამშრომლები სერფბორდით ცდილობენ, რადგან წავს თურმე სწორედ ეს ნივთი ჰყვარებია განსაკუთრებით. სიყვარულიცაა და სიყვარულიც — ეს ცუღლუტი არსება სერფერებს ზღვაში პირდაპირ "აყაჩაღებს". ინტერნეტში ვიდეოებიც კი გავრცელდა, როგორ ეჭიდავება წავი ადამიანებს და ცდილობს, სერფბორდი დაისაკუთროს.

თუმცა, ქურდბაცაცა წავის დაჭერის სამუშაოები ამ დრომდე უშედეგოდ გრძელდება.

ფოტო: Mark Woodward / Native Santa Cruz

როგორც ცნობილია, ყველაფერი 841-ის გამოჩენამდე ჯერ კიდევ ხუთი წლით ადრე დაიწყო, როცა კალიფორნიის ცენტრალურ სანაპიროზე ხალხმა მისი დედა, 723, მოიშინაურა. მსუნაგი 723 აღარც კაიაკებს უშინდებოდა და აღარც მცურავებს, ამიტომ მისი აკვარიუმში გადაყვანა გახდა საჭირო. აქ გაიგეს, რომ წავი მაკედ ყოფილა და მალე პატარა 841-იც დაიბადა. აკვარიუმის მომვლელები ყველანაირად შეეცადნენ, რომ ღია წყლებში გაშვებამდე მათი ახალი ბინადარი ადამიანებთან ძალიან არ გაშინაურებულიყო. თუმცა, ეს მცდელობა წარუმატებელი აღმოჩნდა, რადგან დღეს უკვე ძებნილი 841 არა მხოლოდ მალულად ღრღნის ხალხის ნივთებს, დღისით-მზისით ძარცვავს კიდეც მათ.

არადა, მსგავსი ქცევა ზღვის სამხრეთული წავებისთვის, რომლებიც ადამიანებს უფრთხიან, უჩვეულოა. ზღვის ცხოველთა ეს სახეობა კი გადაშენების პირამდეა მისული, რადგან მათზე ბეწვის გამო ნადირობენ. დღეისთვის 3 ათასამდე სამხრეთული წავიღაა შემორჩენილი ჩრდილოეთ ამერიკის მიმდებარე წყლებში.

სწორედ ამის გათვალისწინებით, ქურდბაცაცა წავს, დაკავების შემთხვევაში, აკვარიუმში დააბრუნებენ, სადაც, დაწესებულების ხელმძღვანელის მტკიცებით, მხოლოდ საუკეთესო საკვებით გაუმასპინძლდებიან ყოველდღე.