პროკურატურამ ცხოველზე სასტიკი მოპყრობის ბრალდებით ერთ პირს ბრალი წაუყენა. საქმე ეხება რუსთავში ორი ცხოველის მიმართ სასტიკ მოპყრობას. ბრალის წაყენების შესახებ ინფორმაციას მთავარი პროკურატურა ავრცელებს.

"გამოძიებით დადგინდა, რომ 2017 წლის 25 და 27 ივნისს, რ. მ.-მ ქალაქ რუსთავში მდებარე გ.თ.-ს კუთვნილი საცხოვრებელი ბინის წინ არსებულ შემოღობილ ტერიტორიაზე, ამ უკანასკნელის ცხოველებს - ლეკვებს პნევმატური იარაღით მიაყენა ჭრილობები, რამაც ერთი ცხოველის სიკვდილი გამოიწვია," - აღნიშნავენ პროკურატურაში.

მათივე ინფორმაციით, უწყებამ სასამართლოს მიმართა და აღკვეთის ღონისძიების სახით სამი ათასი ლარის ოდენობით გირაოს შეფარდება მოითხოვა. საქმეზეგამოძიება გრძელდება "საქართველოს სისხლის სამართლის კოდექსის" 259-ე მუხლის პირველი ნაწილით, რაც სასჯელის სახით ითვალისწინებს მხოლოდ ჯარიმას, ან გამასწორებელ სამუშაოს ვადით ერთ წლამდე.