საქართველოს 21-წლამდელთა ნაკრები ევროპის ახალგაზრდული ჩემპიონატის ჯგუფური ეტაპიდან გავიდა. თანაც რამაზ სვანაძის გუნდმა ამის გაკეთება პირველი ადგილით მოახერხა, რაც იმას ნიშნავს, რომ მეოთხედფინალურ მატჩსაც საკუთარ კედლებში გავმართავთ. ჯგუფის მეორე ადგილოსანი პორტუგალია კი რუმინეთში ითამაშებს.

შესაძლებელი იყო საქართველო ჯგუფიდან წაგების შემთხვევაშიც გასულიყო, მაგრამ ამ შემთხვევაში გარკვეული გამართლება იყო საჭირო და თან პირველი ადგილიც დაიკარგებოდა. მეტოქეს, ნიდერლანდების ნაკრებს მხოლოდ გამარჯვება აძლევდა ხელს და შესანიშნავად დაკომპლექტებულმა სტუმრებმა თავიდანვე აგრესიულად დაიწყეს და მომენტებიც შექმნეს — იყო ძელიც, მამარდაშვილის მოგერიებებიც... თუმცა შემდეგ, საქართველომ შედარებით ამოიწია და ტაიმის მიწურულს ზურიკო დავითაშვილმა ულამაზესი სოლო-გოლი გაიტანა, ბრწყინვალე დრიბლინგით. ამ გოლს ტურნირის საუკეთესოობაზეც ექნება პრეტენზია.

გამომდინარე იქიდან, რომ რამდენიმე პაუზა იყო, მათ შორის მინდორზე ძაღლის სტუმრობის გამო, არბიტრმა ბევრი დაამატა — 5 წუთი. მსაჯი თითქოს ტაიმის დასრულებას აპირებდა, მაგრამ სტუმრებს შეტევა გააგრძელებინა და ნიდერლანდებმა მაშინ გაათანაბრა, როდესაც ამ ხუთ წუთსაც კი გადაცდა, კუთხურის შემდეგ ბურთის კარგად ამოტანა ვერ შევძელით და 1:1.

მეორე ნახევარში მომენტები ორივე კართან იყო, მაგრამ გოლი აღარ გასულა, პარალელურად კი პორტუგალიამ ბელგია დაამარცხა და ჯგუფიდან გასვლა მაინც მოახერხა. პორტუგალია, რომელიც ტურნირის ერთ-ერთ ფავორიტად იყო შერაცხული, პირველ ტურში დავამარცხეთ და თანაბარქულიანობის შემთხვევაში ურთიერთშეხვედრებში უპირატესობა გვექნებოდა, ასე რომ, იმ მატჩის ანგარიშის გათვალისწინებით საქართველო ნიდერლანდებთან წაგებითაც გავიდოდა, მაგრამ მეორე ადგილით.

ჯგუფის მოგება, უპირველეს ყოვლისა, მეოთხედფინალში მატჩის შინ ჩატარების კუთხით გახლდათ მნიშვნელოვანი. გარდა ამისა, საქართველო ოლიმპიადის ლიცენზიისთვის აგრძელებს ბრძოლა. მომავალი მოწინააღმდეგის ვინაობა კი ხვალ გაირკვევა. დანამდვილებით შეგვიძლია ვთქვათ, რომ ეს არ იქნება ინგლისი, რომელმაც C ჯგუფის მოგება გაინაღდა. სავარაუდო მეტოქეები -— ჩეხეთი, გერმანია და ისრაელი არიან.


საქართველოს ბანკი ქართული ფეხბურთის და ევროპის ახალგაზრდული ჩემპიონატის მხარდამჭერია.