უთუოდ გეცოდინებათ, რომ ცნობილ ამერიკულ სიტკომს სიმპსონებს არაერთი გახმაურებული ამბის წინასწარმეტყველებას მიაწერენ. დონალდ ტრამპის პრეზიდენტობიდან უკრაინის ომამდე — სერიალის ფანები, და არა მხოლოდ ისინი, ფიქრობენ, რომ სიმპსონების გამოგონილ სამყაროსა და რეალობას შორის იმდენი მსგავსებაა, შეუძლებელია, ეს, უბრალოდ, დამთხვევა იყოს.

ასეა ამჯერადაც — რამდენიმე დღის წინ ჩაძირული ტიტანიკისკენ მიმავალი წყალქვეშა ტურისტული ნავი ატლანტის ოკეანეში გაუჩინარდა, ინტერნეტმომხმარებლები კი ფიქრობენ, რომ სიმპსონებში ეს ამბავიც წლების წინ იწინასწარმეტყველეს.

სერიალის მე-17 სეზონის ერთ-ერთ ეპიზოდში ვხედავთ, რომ ჰომერ სიმპსონი ოკეანის ფსკერზე ჩაძირული გემის გამოსაკვლევ ექსპედიციას უერთდება. საინტერესოა ისიც, რომ სიმპსონის წყალქვეშა ნავი ატლანტის ოკეანეში გაუჩინარებულ ხომალდს წააგავს. ასევე, ჰომერთან ერთად ექსპედიციაში მიდის კაცი, სახელად მეისონ ფერბენკსი, რომელიც სიმპსონს თავისი ბიოლოგიური მამა ჰგონია. ესეც კიდევ ერთი მსგავსება — რეალობაში გაუჩინარებული ხომალდის ბორტზე იმყოფება მამა-შვილი, შაჰზადა და სულემან დავუდები.

თუმცა, ყველაზე განმაცვიფრებელი მაინც ეპიზოდის გაგრძელებაა — მეისონთან გაშორების შემდეგ, ოკეანის სიღრმეში ჩასული ჰომერი გეზს კარგავს და ფსკერზე იჭედება, ხოლო ბორტზე ჟანგბადის რაოდენობა თანდათან იკლებს. ჰომერთან და მეისონთან ერთად კი, წყალქვეშ ჩასული კიდევ 3 ადამიანი უჩინარდება. მაგრამ ანიმაციაში ამბავს კარგი დასასრული აქვს — გონდაკარგული ჰომერი გადარჩება და უკვე საავადმყოფოში გაიღვიძებს.

2006 წელს გამოსული ეპიზოდიდან ეს ფრაგმენტი ტვიტერზე გავრცელდა და მალევე ვირუსულად მოედო ინტერნეტს. ინტერნეტმომხმარებლების აზრი ისევ იყოფა — ნაწილი ფიქრობს, რომ სიმპსონებმა მართლაც იწინასწარმეტყველეს წყალქვეშა ნავის გაუჩინარება, დანარჩენების აზრით კი, ყველაფერი მხოლოდ და მხოლოდ დამთხვევაა. არიან ისინიც, ვინც კომპიუტერულ სიმულაციაში ცხოვრების კონსპირაციულ თეორიას ემხრობიან და ფიქრობენ, რომ სიმპსონების ეს ეპიზოდიც ამას მოწმობს.

რაც შეეხება რეალობაში გაუჩინარებულ წყალქვეშა ნავს — კომპანია OceanGate-ის ხომალდი, რომელიც ჩაძირული ტიტანიკისკენ მიემგზავრებოდა, 18 ივნისს გაუჩინარდა. ბორტზე მყოფ 5 ადამიანთან კავშირი წყალში ჩაშვებიდან საათისა და 45 წუთის შემდეგ გაწყდა. მას შემდეგ დაწყებული ფართომასშტაბიანი სამძებრო სამუშაოების პროცესში მაშველებმა ძლიერი ხმაურიც დააფიქსირეს. თუმცა, გაუჩინარებულ ხომალდზე ჟანგბადის 4-დღიანი მარაგი, სავარაუდოდ, უკვე ამოწურულია.

ასევე იხილეთ: