კომპანია აუტოპიამ, რომელიც 2010 წლიდან, საქართველოს ბაზარზე ყველაზე ხარისხიანი სერტიფიცირებული ავტონაწილების მომწოდებელია, თიბისის მხარდაჭერით კიდევ ერთი, ამჯერად ქუთაისის ფილიალი გახსნა.

აუტოპია უდიდესი ევროპული კომპანიების, მათ შორის, PRASCO-ს, RHIBO-სა და MAXICAR-ის წარმომადგენელია საქართველოში და პროდუქციის 90%-ზე მეტი სწორედ ამ კომპანიებზე მოდის, რაც იმას ნიშნავს, რომ მათი სტანდარტების შესაბამისად მუშაობენ.

აუტოპიამ საქმიანობა თბილისსა და ქუთაისში გახსნილი ორი პატარა მაღაზიით დაიწყო და 300-მდე დასახელების ადაპტირებად, სერტიფიცირებულ ნაწილებს ყიდდნენ.

კომპანიის დამფუძნებლისა და დირექტორის, ირაკლი არჩვაძის თქმით, პროფილი თავიდანვე განსაზღვრული ჰქონდათ — მაღალი ხარისხის ძარის ნაწილებზე მუშაობდნენ, რაც შედარებით მაღალ ფასს განაპირობებდა, თუმცა სწორედ ხარისხმა განაპირობა ის, რომ ერთგული მომხმარებელი მალევე შეიძინეს.

"პირველი ორი წლის განმავლობაში, სირთულეების მიუხედავად, საქმე ისე კარგად წავიდა, რომ 2013 წელს გაფართოება გადავწყვიტეთ. გავაკეთეთ რებრენდინგი, კომპანიას დავარქვით აუტოპია, გავხდით PRASCO-ს პარტნიორები, დავიწყეთ ასორტიმენტისა და სერვისის გაფართოებაზე ზრუნვა. თანდათან ჩვენი პარტნიორების რიგებს შეემატა ისეთი მსხვილი კომპანიები, როგორებიცაა ბერძნული მწარმოებელი — GBG და ტაივანური მწარმოებლები TONG YANG, DEPO და TYC", — აღნიშნავს ირაკლი.

ამასთან, აუტოპიამ მომარაგების მარშრუტის შეცვლა გადაწყვიტა და თუ იქამდე პარტნიორი კომპანიები ევროპიდან ამარაგებდნენ, 2013 წლიდან პირდაპირ მწარმოებლისგან იღებენ პროდუქციას, რამაც ფასების შემცირება გამოიწვია და ქართულ ბაზარზე ყველაზე ხელმისაწვდომ ფასად განაგრძეს რეალიზაცია. ამჟამად აუტოპიას პროდუქციის 90%-ზე მეტი ტაივანიდან მოეწოდება.

თუმცა, კომპანიის განვითარება ამით არ შეჩერებულა, სულ უფრო ფართოვდებიან და ახალ-ახალ ფილიალებს ხსნიან.

"2014 წელს გავხსენით ელიავას ფილიალი, ხოლო 2015 წელს დიღმის ფილიალი — 500მ2 ფართის მაღაზია. გამორჩეულად მნიშვნელოვანი იყო 2017 წელი, როცა თანამშრომლობა დავიწყეთ საქარე მინების მწარმოებელ გიგანტთან XYG-თან და იმავე წლიდან ვართ ამ კომპანიის ლიდერი დისტრიბუტორი რეგიონში", — ჰყვება ირაკლი.

გარდა ამისა, აუტოპია პიონერი გახდა ციფრული არხების ათვისების მიმართულებითაც, ჯერ კიდევ 2012 წლიდან აქვთ საკუთარი ვებგვერდი.

"ამ საქმეშიც პიონერები ვიყავით, რადგან მანამდე ჩვენი პროფილის არც მაღაზია არსებობდა საქართველოში და, რა თქმა უნდა, არც ვებგვერდი, რომელზეც გამოტანილი იყოო პროდუქციის ფასები. ეს, ერთი მხრივ, დიდი რისკი იყო ჩვენთვის, რადგან ფასების ღიად დაფიქსირებით იოლი სამიზნე ვხდებოდით კონკურენტებისთვის, მაგრამ, მეორე მხრივ, იყო კომპანიის ხარისხის მაჩვენებელი და მომხმარებელზე ორიენტირებული გადაწყვეტილება, რამაც თავისი დადებითი შედეგები მალევე გამოიღო — შევიძინეთ კიდევ უფრო მეტი ხარისხზე ორიენტირებული მომხმარებელი", — ამბობს ირაკლი.

რისკიანმა გადაწყვეტილებებმა აუტოპიას მეტად განვითარების შესაძლებლობა მისცა:

  • 2018 წელს მეორე, 1500 კვ.მ ფართის ფილიალი გახსნეს თბილისში — ლილოში;
  • 2020 წელს გაიხსნა ბათუმის ფილიალი;
  • 2022 წელს კი, თიბისის მხარდაჭერით, აწარმოე საქართველოს პროექტის ფარგლებში, მიწის ნაკვეთი შეიძინეს და საკუთარი ფართი ააშენეს.

"დღეის მდგომარეობით, 12 ათასზე მეტი დასახელების ავტონაწილის რეალიზაციას ვახდენთ და კომპანიის წლიური ბრუნვა 12 ლარია. პროდუქციას ვყიდით ჩვენს მეზობელ ქვეყნებშიც. აუტოპიაში დასაქმებულია 30 ადამიანი — კონსულტანტები, ავტოექსპერტები, მენეჯერები, სერვისის სპეციალისტები. ფილიალების და საწყობების საერთო ფართი კი 4700 მ2-ია", — აღნიშნავს ირაკლი.

ირაკლი არჩვაძის თქმით, აუტოპიას წარმატების გასაღები მომხმარებლის საჭიროებაზე ორიენტირებაა.