რა მოხდა: გლობალური მაკდონალდსის კამპანიის ფარგლებში მაკდონალდს საქართველომ ელტონ ჯონსა და არეტა ფრანკლინზე წიგნი გამოუშვა, რომელიც Happy Meal-ის სასაჩუქრე მენიუს მოჰყვებოდა.

• ამ ფარგლებში არაერთი წიგნი გამოვიდა, რომელიც ცნობილი ადამიანების ბავშვობაზე გვიაბობს, თუმცა ყველაზე დიდი აჟიოტაჟი სწორედ ბოლო გამოშვებას მოჰყვა.
• ელტონ ჯონის ბიოგრაფიაში ეწერა, რომ "დაქორწინდა და მეუღლესთან, დევიდთან და ორ ვაჟთან ერთად შექმნა ოჯახი, რომელზეც ყოველთვის ოცნებობდა".
• კომპანიის წინააღმდეგ მადესკრედიტირებელ კამპანიას, რომლითაც ბავშვებში "ლგბტ პროპაგანდის გავრცელებაში" ადანაშაულებდნენ, სათავეში ქართული ოცნება ედგა და მასში პროსახელისუფლებო არხებიც მონაწილეობდნენ.
• მაგალითად, ქართული ოცნების დეპუტატი, მამუკა მდინარაძე ამტკიცებდა, თითქოს ბავშვებს "ლგბტ პროპაგანდის შემცველ დოკუმენტაციას აწვდიან" და ამას "ამაზრზენი ფაქტი" უწოდა.
• "ეს აღმაშფოთებელია, უბრალოდ კატასტროფაა! ბავშვებთან ლგბტ პროპაგანდის ჩატარება გამაოგნებელია", — ამბობდა კიდევ ერთი დეპუტატი, ირაკლი კობახიძე.

სტრიქონებს შორის: ქართული ოცნება არც იქამდე ერიდებოდა ჰომოფობიური დამოკიდებულებების გამჟღავნებას, თუმცა ეს რიტორიკა განსაკუთრებით ბოლო პერიოდში გაძლიერდა.

• ასეთი განცხადებები ხშირად გვესმის პირველი პირებისგან, მათ შორის, ირაკლი ღარიბაშვილისგანაც.

რას წერს მაკდონალდს საქართველო: მათი თქმით, ინფორმაცია, რომ რამე სახის პროპაგანდას ეწევიან, საზოგადოების შეცდომაში შეყვანას ემსახურება მიზნად.

• ამბობენ, რომ მაკდონალდს გლობალის შემეცნებით-საგანმანათლებლო პროგრამის, Happy Meal Reader-ის ერთადერთი ბავშვებისთვის წარმატების მიღწევის მოტივაციის მიცემაა.
• ამის შემდეგ კი კომპანია თავის მართლებაზე გადადის და წერს, რომ გამოცემა ლიცენზირებულია, რაც თარგმნისას შინაარსის რამე სახით შეცვლას კრძალავს.
• ამბობენ, რომ ორიგინალი ვერსიის ქართულად თარგმისას და რედაქტირებისას "ჯეროვნად არ იქნა გათვალისწინებული კონტექსტი და მოხდა შინაარსის პირდაპირ და უხეშად კოპირება".
• მეტიც, ამას სამწუხაროდ უწოდებენ და მაკდონალდს საქართველოს აღმასრულებელი გუნდის შეცდომაზე საუბრობენ.

გარდა ამისა, ქართული ოცნების მიერ აგორებული მადისკრედიტირებელი კამპანიის შემდეგ, მთელ პასუხისმგებლობას წიგნის გამოცემაზე, მათ შორის თარგმნასა და რედაქტირებაზე, მაკდონალდს საქართველოს ადმინისტრაციის გუნდს აკისრებენ.

• "პროცესის შინაარსობრივ ნაწილში არც კომპანია კოკა-კოლას და არც ბატონ თემურ ჭყონიას მონაწილეობა არ მიუღიათ".
• ისინი ბოდიშს იხდიან "დაშვებული შეცდომისთვის" და ამბობენ, რომ მენეჯმენტი სრულად იზიარებს ამ შეცდომას.
• "მაკდონალდს საქართველოსთვის ისევე, როგორც მისი დამფუძნებლისთვის, ბატონ თემურ ჭყონიასთვის მთავარი ღირებულება ადამიანია და სწორედ ადამიანის გარშემო აშენებს ბრენდს, რომელიც თითქმის 25 წელია, მილიონობით მომხმარებლის ერთგულია".
• კომპანიამ პოსტი მალევე წაშალა.
• მანამდე ნეტგაზეთთან მიცემულ ინტერვიუში, თემურ ჭყონია ამბობდა, რომ ერთსქესიანთა ქორწინების კატეგორიული წინააღმდეგია, თუმცა ყველა ადამიანს თავისი ცხოვრება აქვს და რაღაცის არმოწონება სიძულვილს და დევნას არ უნდა იწვევდეს.