3-4 ივნისს, წისქვილის ეზოში სვანეთის დღეები მოეწყო. სტუმრებმა ორი დღის განმავლობაში დააგემოვნეს გამორჩეული სვანური კერძები, გაეცვნენ კუთხის ფოლკლორსა და ქორეოგრაფიას და მონაწილეობა მიიღეს მრავალფეროვან აქტივობებში.

ღონისძიების ერთ-ერთი გამორჩეული მონაწილე იყო ასწლოვანი ანსამბლი — რიჰო, რომელმაც დამსწრე საზოგადოებას სვანური ფოლკლორის უძველესი ნიმუშები და მათი ავთენტური ვერსიები წარუდგინა. სტუმრების დიდი მოწონება დაიმსახურა ანსამბლ ლალხორის შესრულებამაც.

ფოტო: წისქვილი

"დედაქალაქში ჩამოგიტანეთ სვანების მოკითხვა და დიდი სითბო. უკან, ჩვენ მხარეში კი ძალიან კარგი ემოციებით დატვირთული ვბრუნდებით, რისთვისაც დიდ მადლობას ვუხდით ამ ლამაზი ღონისძიების ინიციატორებს", — ამბობს ვახტანგ ფილფანი, ანსამბლ რიჰოს ხელმძღვანელი.

გასულ შაბათ-კვირას, წისქვილის ეზოში მისულ სტუმრებს შესაძლებლობა ჰქონდათ შეფმზარეულებთან ერთად თავად მოემზადებინათ სვანური კერძები და კუთხის გასტრონომია ამ ფორმითაც გაეცნოთ. მრავალფეროვანი გასართობი აქტივობები დახვდათ ბავშვებსაც მათთვის სპეციალურად მოწყობილ სივრცეში. ამასთან ერთად, წისქვილის ეზოში გაიმართა გამოფენა-გაყიდვა.

ფოტო: წისქვილი

ფოტო: წისქვილი

"გამოფენა-გაყიდვაზე წარმოდგენილი იყო სვანეთიდან ჩამოტანილი პროდუქცია, რამაც ძალიან დიდი ინტერესი გამოიწვია სტუმრებში. დამსწრე საზოგადოების განსაკუთრებული აღფრთოვანება კი ანსამბლების — რიჰოსა და ლალხორის ფოლკლორულმა და ქორეოგრაფიულმა შესრულებამ დაიმსახურა. სტუმრებს, სვანურ კულტურასთან ზიარების გარდა, შესაძლებლობა ჰქონდათ ბატონი ვახტანგ ფილფანის მონათხრობით, სვანეთის მრავალსაუკუნოვან ისტორიასაც გასცნობოდნენ.

"მინდა, უღრმესი მადლობა გადავუხადო თითოეულ მონაწილეს ნამდვილი სვანური დღესასწაულის მოწყობისთვის და დახმარებისთვის, რომ განგვეხორციელებინა ჩვენი იდეა: ქართული კულტურის პოპულარიზაცია ქართველ და უცხოელ სტუმრებში. აუცილებლად დაველოდებით ამ არაჩვეულებრივ ადამიანებს მომავალ წელსაც", — ამბობს წისქვილი ჯგუფის მარკეტინგის სპეციალისტი, მარიამ საღლიანი.

სხვადასხვა რეგიონისადმი მიძღვნილი დღეები წისქვილი ჯგუფის ახალი ინიციატივის, ქართული კუთხეების ფესტივალის ფარგლებში იმართება. ფესტივალი 30 ივლისამდე გაგრძელდება და წისქვილის ეზო საქართველოს სხვადასხვა მხარეებს ყოველ მეორე შაბათ-კვირას უმასპინძლებს.

მომდევნო ღონისძიება 10-11 ივნისს გაიმართება. ამჯერად თავის კულტურასა და გასტრონომიას სტუმრების წინაში კახეთი წარადგენს. დეტალების სანახავად გადადით აღნიშნულ ბმულზე.