ცოტა ხნის წინ ცნობილი გახდა, რომ გახმაურებული საი-ფაი სერიალი Black Mirror მაყურებელს მე-6 სეზონით უბრუნდება. ახლახან კი ნეტფლიქსმა სერიალის კიდევ ერთი ტრეილერი გამოუშვა და პრემიერის თარიღიც დაასახელა. მაყურებელი მონატრებულ Black Mirror-ს 15 ივნისს იხილავს.

წინა სეზონებისგან განსხვავებით, Black Mirror-ის მე-6 სეზონის ეპიზოდები ფილმის სტილში იქნება. აქამდეც ცნობილი იყო, რომ შოუს ახალი სეზონის თითოეული ეპიზოდი უფრო კინემატოგრაფიული ხასიათის იქნებოდა და მათი ქრონომეტრაჟიც გაიზრდებოდა. მე-6 სეზონში ხუთ ასეთ "ფილმს" ვიხილავთ, რომელთა ხანგრძლივობაც სხვა ეპიზოდებთან შედარებით მეტი იქნება.

Black Mirror-ის ახალ ტრეილერში თითქმის ყველა ეპიზოდიდან რამდენიმე კადრს ვხედავთ. ტრეილერის მიხედვით, ენი მერფის პერსონაჟი სერიალს აღმოაჩენს, რომელიც მთლიანად მის ცხოვრებაზეა დაფუძნებული. შემდეგ კი როგორ განვითარდება მოვლენები, ამას სულ მალე გავიგებთ.

ცნობილია Black Mirror-ის მე-6 სეზონში მონაწილე მსახიობების ვინაობაც და შოუში ისეთ ვარსკვლავებს ვიხილავთ, როგორებიც ბენ ბარნსი, სალმა ჰაიეკი, აარონ პოლი, ანჯანა ვასანი, ენი მერფი და ოდენ ტორნტონი არიან. ასე რომ, 15 ივნისამდე მხოლოდ ლოდინი დაგვრჩენია.