რატომ არის მნიშვნელოვანი: 22 მაისს, დილით, რუსეთის მოხალისეთა კორპუსის მებრძოლებმა განაცხადეს, რომ რუსეთში არიან — მათ გამოაქვეყნეს ვიდეო ბრიანსკისა და ბელგოროდის ოლქებიდან, რომელშიც ამბობდნენ, რომ გადაკვეთეს რუსეთის საზღვარი და "მალე ქვეყანა თავისუფალი იქნება".

• დილიდანვე რუსულ ტელეგრამ არხებზე აქტიურად ვრცელდება ინფორმაცია და ვიდეოები, რომ ბელგოროდში რამდენიმე დასახლებული და რუსეთის სასაზღვრო პუნქტი გაანადგურეს.
• ასევე, ადვილობრივები აქვეყნებენ კადრებს, რომლებშიც სირენების ხმა ისმის.

კიდევ რა მოხდა: ამავდროულად, რუსეთის თავისუფლების ლეგიონმა, რომელიც უკრაინის მხარეს იბრძვის, ჩაწერა ვიდეო და მოუწოდა რუსებს, იბრძოლონ პუტინისგან ქვეყნის გასათავისუფლებლად.

• ამას მომდევნო ვიდეოც მოჰყვა, რომელშიც ლეგიონის წევრებმა რუსეთის საზღვრისპირა მაცხოვრებლებს მიმართეს, დარჩნენ სახლში და მათ წინააღმდეგობა არ გაუწიონ.
• "ნუ გეშინიათ, ჩვენ თქვენი მტრები არ ვართ. პუტინის ზომბებისგან განსხვავებით, ჩვენ არ მოგაყენებთ ზიანს", — ამბობდნენ მებრძოლები.
• მოგვიანებით, ლეგიონმა გამოაქვეყნა კიდევ ერთი ვიდეო, რომელშიც რუსეთში ბელგოროდის ოლქის დასახლების, კოზინკას გათავისუფლების შესახებ იუწყებოდნენ — მათივე თქმით, შევიდნენ გრაივორინის დასახლებაში და წინ მიიწევენ.

ბრალდებები უკრაინას: ბელგოროდის ოლქის გუბერნატორმა, ვიაჩესლავ გლადკოვმა დაადასტურა, რომ გრავოირონის ოლქზე თავდასხმა მოხდა და "მშვიდობიანი მოსახლეობა დაშავდა".

• მომხდარში მან "უკრაინის შეიარაღებული ძალების სადაზვერვო-დივერსიული ჯგუფი" დაადანაშაულა, თუმცა უკრაინის დაზვერვამ განაცხადა, რომ ბელგოროდში ოპოზიციურად განწყობილი რუსები შევიდნენ.
• უკრაინის პრეზიდენტის ადმინისტრაციის უფროსმა მრჩეველმა, მიხაილო პოდოლიაკმაც დაწერა, რომ უკრაინას ამასთან პირდაპირი კავშირი არ აქვს, მაგრამ ინტერესით ადევნებენ თვალს მიმდინარე მოვლენებს.
• მანვე აღნიშნა, რომ ტოტალიტარულ ქვეყანაში ერთადერთი მამოძრავებელი ძალა შეიარაღებული პარტიზანული მოძრაობა ხდება.

რას აკეთებს რუსეთი: ოლქის გუბერნატორმა აღნიშნა, რომ თანამშრომლობენ რუსეთის სასაზღვრო დაცვის სამსახურთან, ეროვნულ გვარდიასთან, FSB-სთან და "ყველა ზომას მიიღებენ მტრის გასანეიტრალებლად".

• მისივე თქმით, გააქტიურდა რუსული საჰაერო თავდაცვა და რუსეთის ოპერატიული სამსახურები "კარდაკარ საფუძვლიან შემოწმებას ახორციელებენ".
• რუსეთის საგანგებო სიტუაციების სამსახურმა ადგილობრივ მოსახლეობას თავდასხმის შეტყობინება გაუგზავნა, ხოლო შებეკინსკის ოლქების მოსახლეობას თავშესაფარში ჩასვლისკენ მოუწოდა.
• როგორც პრეზიდენტის პრესსპიკერი, დმიტრი პესკოვი ამბობს, პუტინი ბელგოროდში არსებულ ვითარებაზე ინფორმირებულია.
• ამტკიცებდა, თითქოს დივერსიის მიზანი იყო "ბახმუტის მიმართულებიდან ყურადღების გადატანა, უკრაინული მხარის მიერ არტემოვსკის დაკარგვის პოლიტიკური ეფექტის მინიმუმამდე შემცირება".
• სხვა განცხადება კრემლიდან არ გაკეთებულა, როგორც ჩანს ჯერ მესიჯბოქსზე მუშაობენ.

ბოლო სიახლეები: უკრაინულ ტელეგრამ არხებზე ვრცელდება ვიდეოები, რომლებშიც, სავარაუდოდ, ბელგოროდში უკრაინული სამხედრო ტექნიკის გადაადგილება ჩანს, თუმცა ადგილმდებარეობის ზუსტად დადგენა შეუძლებელია.

• იქვე წერენ, რომ შეტევაზე გადავიდნენ რუსული დანაყოფები, რომლებიც უკრაინისთვის იბრძვიან.
• თავად ლეგიონმა კი გაავრცელა რამდენიმე ფოტო და დაწერა, რომ გათავისუფლებულ დასახლებულ პუნქტებში უკვე ფრიალებს რუსეთის ალტერნატიული დროშები, რომლებზეც წითელი ფერი არ არის.
• SOTA აქვეყნებს ვიდეოს, რომელშიც, სავარაუდოდ, ბელგოროდის ოლქის მოსახლეობის ევაკუაცია მიმდინარეობს — ოფიციალურად ჯერ ევაკუაცია არ გამოცხადებულა.