უელსის პატარა ქალაქი ჰეი ყოველწლიურად, გაზაფხულის მიწურულსა და ზაფხულის დასაწყისში, ლიტერატურისა და ხელოვნების მასშტაბურ, 10-დღიან ფესტივალს მასპინძლობს. 1988 წელს დაფუძნებული ღონისძიება, რომელიც თავის დროზე ბილ კლინტონმა გავლენიანობით ვუდსტოკსაც კი შეადარა, დღეს ბრიტანელებისთვის ერთ-ერთ ყველაზე მნიშვნელოვან ლიტერატურულ მოვლენად მიიჩნევა.

ჰეის ფესტივალზე წელს განსაკუთრებული სიახლეა — რადგან ბრიტანეთი ევროვიზიის სიმღერის კონკურსს 25 წლის შემდეგ პირველად მასპინძლობს, ორგანიზატორებმა გადაწყვიტეს, ევროფესტივალის ანალოგი შეექმნათ. ევროვიზიის წიგნის კონკურსი, რომელიც წელს პირველად იმართება, ხაზს უსვამს ლიტერატურის როლს ქვეყნებს შორის საყოველთაო ღირებულებების გავრცელებაში.

სწორედ ამიტომ, წელს გადაწყდა, რომ კონკურსში მონაწილეობა 37 წიგნს მიეღო — თითოეული წლევანდელ ევროვიზიაზე მონაწილე ერთ-ერთი ქვეყნიდან. შერჩევის პროცესში ათასობით მკითხველი მონაწილეობდა, ევროვიზიის ფინალამდე ერთი დღით ადრე კი, 12 მაისს, ორგანიზატორებმა რჩეული წიგნების სია გამოაქვეყნეს.

სიის მიხედვით, ევროვიზიის წიგნის წლევანდელ კონკურსზე საქართველოს ნინო ხარატიშვილის მერვე სიცოცხლე (ბრილკას) წარადგენს. 37 ქვეყნიდან საუკეთესო ნაწარმოების გამოვლენაში ფესტივალის სტუმრებიც მიიღებენ მონაწილეობას, გამარჯვებული კი 2 ივნისს დასახელდება.

აღსანიშნავია, რომ 37 წიგნის ჩამონათვალი მრავალფეროვანია — განსხვავდება ჟანრობრივად და ეპოქითაც კი. თუმცა, ყველა მათგანი მაინც აკმაყოფილებს კონკურსის მთავარ მოთხოვნას — გამოცემულია ევროვიზიის დაარსების, 1956 წლის, შემდეგ.

ევროვიზიის წიგნის კონკურსის რჩეულ ავტორებს შორის კი, ხარატიშვილთან ერთად, აღმოჩნდნენ ისმაილ კადარე (ალბანეთი), მარკუს ზუზაკი (ავსტრალია), მილან კუნდერა (ჩეხეთი), ტუვე იანსონი (ფინეთი), ოლგა ტოკარჩუკი (პოლონეთი), მარჯან სატრაპი (საფრანგეთი), პატრიკ ზიუსკინდი (გერმანია), ელენა ფერანტე (იტალია), მილორად პავიჩი (სერბეთი), სერჰი ჟადანი (უკრაინა) და სხვები.

იმის მიუხედავად, რომ მერვე სიცოცხლე კონკურსზე საქართველოს წარადგენს, რომანი გერმანულ ენაზეა დაწერილი. 2014 წელს გამოცემული ეს მასშტაბური წიგნი ბევრ ქვეყანაში, მათ შორის საქართველოში, ბესტსელერად იქცა. ხარატიშვილი "ტოლსტოის მემკვიდრედაც" მოუხსენიებიათ. მისი წიგნები მსოფლიოში მილიონზე მეტ ეგზემპლარადაა გაყიდული. მერვე სიცოცხლით ავტორი გახდა ბუკერის საერთაშორისო პრემიისა და დუბლინის ლიტერატურული პრემიის ნომინანტი. ხარატიშვილს გერმანიაში ასევე მიღებული აქვს კარლ ცუკმაიერის მედალი და გიზელა ელსნერის პრემია.

წინა წლის მიწურულს ქართულად ითარგმნა მწერლის ამ დროისთვის ბოლო რომანი უკმარი სინათლე. აღნიშნული წიგნი გასულ წლის ბერლინალეზე იმ 10 საუკეთესო რომანს შორის დაასახელეს, რომელთა ეკრანიზაციასაც კინოხელოვანებს ურჩევენ. ჯერ კიდევ ორიგინალურ ენაზე გამოცემამდე ხარატიშვილის ამ ნაწარმოების თარგმნის უფლება 10-ზე მეტ ქვეყანაში გაიყიდა, მათ შორის, მსოფლიოს ერთ-ერთ უდიდეს გამომცემელ HarperCollins-ზე. აღსანიშნავია ისიც, რომ ქართულ ენაზე წიგნის გამოცემიდან მესამე დღეს ტირაჟი ამოიწურა.