უკრაინა ამტკიცებს, რომ რამდენიმე თვიანი მძიმე ბრძოლების შემდეგ ბახმუტის ტერიტორიაზე დაწინაურდნენ.

რატომ არის მნიშვნელოვანი: აღმოსავლეთ უკრაინაში მდებარე ბახმუტი საეჭვო სტრატეგიული ღირებულების, მაგრამ სიმბოლური მნიშვნელობის ქალაქია, რომლის ასაღებადაც თვეებია სასტიკი ბრძოლები მიმდინარეობს.

  • რუსეთმა არაერთხელ გაავრცელა ინფორმაცია, რომ ალყა შემოარტყა ქალაქს, თუმცა, აქამდე, ჯერ არ დადასტურებულა უკრაინელების დანებება და ქალაქის დატოვება.
  • თვეების ჩიხის შემდეგ, ღიად განიხილება უკრაინის კონტრშეტევა — ახლად შემოსული დასავლური იარაღის დახმარებით, მაგრამ უკრაინის პრეზიდენტმა ხუთშაბათს განაცხადა, რომ ჯერ ნაადრევია თავდასხმის დაწყება.
  • საჰაერო თავდასხმების პარალელურად, უკრაინამ განაცხადა, რომ გაანადგურა ცხრა რუსული უპილოტო თვითმფრინავი და წარმატებული შეტევა განახორციელა ათეულობით სამხედრო სამიზნეზე — მათ შორის საარტილერიო დანაყოფებზე, საბრძოლო მასალის საწყობზე და საჰაერო თავდაცვის აღჭურვილობაზე.

გამოხმაურებები: უკრაინის თავდაცვის მინისტრის მოადგილემ, ჰანა მალიარმა განაცხადა, რომ ბახმუტში უკრაინული ძალები ბოლო კვირაში ორი კილომეტრით დაწინაურდნენ.

  • რუსეთმა უარყო ინფორმაცია ბახმუტში უკრაინის წინსვლის შესახებ და განაცხადა, რომ "სპეციალური სამხედრო ოპერაციების ზონაში ზოგადი ვითარება კონტროლს ექვემდებარება".
  • "Telegram-ის ცალკეული განცხადებები ფრონტის ხაზის რამდენიმე პუნქტში "გარღვევის" შესახებ არ შეესაბამება რეალობას", — აცხადებენ რუსეთის თავდაცვის სამინისტროში.
  • რუსი ომის კორესპონდენტი, ალექსანდრე სიმონოვი, ტელეგრამზე წერდა, რომ უკრაინულმა ძალებმა ბახმუტთან ახლოს, სოფელ ბოჰდანივკას მახლობლად გაარღვიეს და აიღეს "რამდენიმე კვადრატული კილომეტრი" მიწა.
  • ომის შესწავლის ინსტიტუტმა განაცხადა, რომ უკრაინულმა ძალებმა ბახმუტში, სავარაუდოდ, 2 კილომეტრით წინ წაიწიეს.

ვაგნერის დაჯგუფება: გავრცელებული ინფორმაციით, რუსეთის არმიის მთავარ დასაყრდენს ქალაქში ვაგნერელები წარმოადგენს, რომლებიც იმუქრებიან, რომ საჭირო შეიარაღების არ მიწოდების გამო ქალაქს დატოვებენ.

  • ევგენი პრიგოჟინმა, ვაგნერის დაქირავებული ჯგუფის ხელმძღვანელმა, რომელიც რუსეთის მხარეს იბრძვის, რეგულარული რუსული ჯარები ბახმუტში პოზიციების მიტოვებაში დაადანაშაულა.