რატომ არის მნიშვნელოვანი: საქართველოს მოქალაქე ქრისტინე თაკალანძე საოკუპაციო რეჟიმა 2022 წლის ივლისში უკანონოდ დააკავა.

  • დე ფაქტო უწყებები მას ჯაშუშობას ედავებოდნენ, რაც სისხლის სამართლის დანაშაულია.
  • საოკუპაციო რეჟიმმა გაავრცელა დაკავების კადრებიც, რომლებშიც ჩანდა, რომ ჩხრეკდნენ ქალის პირად ნივთებს, პირადობის და ქორწინების მოწმობას, ბანკის პლასტიკურ ბარათებს და წერილებს, რომლებშიც ძირითადად პირადი შინაარსის კომუნიკაცია ჩანდა.
  • იყო კიდევ ერთი ნახევრად დამწვარი წერილის კადრი, რომელშიც გაუმართავი ქართულით ჯაშუშობასთან დაკავშირებული ფრაზები წერია, თუმცა მისი შინაარსი აჩენდა ეჭვს, რომ გაყალბებულია.
  • დე ფაქტო უწყება ამტკიცებდა, რომ თაკალანძე "სახელმწიფო და სამხედრო" ინფორმაციას აგროვებდა და საქართველოს სპეცსამსახურებს გადასცემდა.
  • აღკვეთის ღონისძიების სახით თაკალანძეს უკანონო პატიმრობა შეუფარდეს.

დეტალები: დღეს კი ოკუპირებული აფხაზეთის ე.წ. სასამართლომ მას 10 წლითა და 6 თვით უკანონო პატიმრობა მიუსაჯა.

  • როგორც საქართველოს სახელმწიფო უსაფრთხოების სამსახურში ამბობენ, თაკალანძის მიმართ საოკუპაციო რეჟიმის მხრიდან განხორციელებულ ძალადობრივ და უკანონო ქმედებებთან დაკავშირებით, საერთაშორისო თანამეგობრობამ არაერთგზის დააფიქსირა კონსოლიდირებული პოზიცია და დაგმო დანაშაულებრივი პრაქტიკა.
  • მათივე თქმით, უკანონო პატიმრობის პირველივე დღიდან, ცენტრალური ხელისუფლება იყენებს ყველა არსებულ მექანიზმს და ეს საკითხი საერთაშორისო პარტნიორების დღის წესრიგის უმნიშვნელოვანეს კომპონენტს წარმოადგენს.
  • "ერთობლივი ძალისხმევით, კეთდება ყველაფერი, რათა უკანონო პატიმრობაში მყოფი ქრისტინე თაკალანძე დაუბრუნდეს საკუთარ ოჯახს. საქართველოს ოკუპირებულ რეგიონებსა და საოკუპაციო ხაზის გასწვრივ განხორციელებულ ყველა დესტრუქციულ ქმედებაზე პასუხისმგებლობა ეკისრება საოკუპაციო ძალას", — ვკითხულობთ სუს-ის განცხადებაში.