გირჩის ლიდერი ზურაბ ჯაფარიძე ყოფილი პრემიერის ბიძინა ივანიშვილის ღია წერილს პასუხობს და მის ეკონომიკურ ხედვას აკრიტიკებს.

ჯაფარიძე ამბობს, რომ მთავრობის მიერ სოფლის მეურნეობაში გადახდილი 755 მილიონი ლარი არამომგებიანია, რადგან ჩვენი შემოსავლის მხოლოდ 9%-ს შეადგენს სოფლის მეურნეობა:

"მთავრობამ 2013-2015 წლებში გაჭირვებული ხალხის გადახდილი 755 მილიონი ლარი ისროლა სოფლის მეურნეობაში! რა შედეგი მივიღეთ? 2012 წელთან შედარებით 2016 წელს სოფლის მეურნეობის გამოშვება ჯამში გაზრდილია 585 მილიონი ლარით. ანუ, 755 მილიონი დავხარჯეთ და გამოშვება გაიზარდა 585 მილიონით.

1 ლარი საჭმლის შესაქმნელად დახარჯული გვაქვს 1.29 ლარი განათლებაში, ენერგეტიკაში, ტელეკომუნიკაციებში შექმნილი დოვლათი. თქვენი მთავრობის აზრით ეს იმის ბრალია, რომ ხეები დარგეთ და უნდა დაელოდოთ რამდენიმე წელი რომ მოისხას.

კითხვა - საკუთარი ფულით გარისკავდით ასეთ ინვესტიციას?"

გირჩის ლიდერის თქმით, საქართველოს მოქალაქეები 2 დიდ ტყუილში ცხოვრობენ, როცა სჯერათ, რომ საქართველო აგრარული ქვეყანაა და სოფლის მეურნეობაში ბიუჯეტიდან ფულის ჩადებით აგრარული სექტორი განვითარდება.

ჯაფარიძე მიიჩნევს, რომ სოციალური სისტემა შესაცვლელია და ბიუჯეტის ფული ღარიბ ოჯახებს უნდა მოხმარდეთ.

ცოტა ხნის წინ TI-მ კვლევა ჩაატარა, რომლის მიხედვითაც მოსახლეობის 51%-ის აზრით, საქართველოს ეკონომიკის წინსვლისთვის მთავარი სოფლის მეურნეობის განვითარებაა.