კავკასიის კვლევითი რესურსების ცენტრის (CRRC) გამოკითხვის შედეგების თანახმად, რომელიც საერთაშორისო გამჭვირვალობა - საქართველოს დაკვეთით ჩატარდა, მოსახლეობის 51% მიიჩნევს, რომ ქვეყნის ეკონომიკის წინსვლისთვის მთავარი სოფლის მეურნეობის განვითარებაა.

აღნიშნული 51%-დან 58% 56 წელს გადაცილებული მოსახლეობაა, ხოლო 41% წარმოადგენს 18-35 წლის ასაკის მოსახლეობას.

გამოკითხულთა 23%-ის აზრით, წარმოება, ქარხნები და ფაბრიკების განვითარება არის ქვეყნის ეკონომიკისთვის ყველაზე მნიშვნელოვანი.

ვრცელი ინფორმაციისთვის იხილეთ კვლევის გრაფიკი:

TI კვლევაში აღნიშნავს, რომ განვითარებული ქვეყნების ეკონომიკაში სოფლის მეურნეობის სექტორს წამყვანი როლი არ უკავია და ზოგადად, ამ სფეროს წინსვლა დამოკიდებულია ტექნოლოგიებზე და არა - ადამიანებზეა:

"სწორედ საზოგადოების ამ მოსაზრებებიდან გამომდინარე, მთავრობა საარჩევნოდ მოტივირებულ გადაწყვეტილებებს იღებს და ხმების მოზიდვის მიზნით სახელმწიფო ფინანსებს სოფლის მეურნეობის სექტორში არაეფექტიანად ხარჯავს. ეს კი ქვეყნის ეკონომიკის წინსვლას და თითოეული ჩვენგანის ცხოვრების დონის ზრდას მნიშვნელოვნად აფერხებს.

თუ მოსახლეობის პრიორიტეტი სოფლის მეურნეობის სექტორი აღარ იქნება, სახელმწიფო ნაკლებად დახარჯავს რესურს ამ მიმართულებით, საიდანაც უკუგება ძალიან მცირეა. თუ ნაკლები ფინანსები დაიხარჯება არაეფექტიანად, ეს ქვეყნის ეკონომიკაზე და ჩვენი ცხოვრების დონეზეც დადებითად აისახება. ამიტომ ძალიან მნიშვნელოვანია საზოგადეობის განწყობები და შეხედულებები ამა თუ იმ საკითხის მიმართ, რადგან ჩვენი მოსაზრებები მნიშვნელოვნად ახდენს გავლენას სახელმწიფოს პოლიტიკაზე, რაც თავის მხრივ დიდ წილად განსაზღვრავს ჩვენი ცხოვრების დონეს".

საერთაშორისო გამჭვირვალობა - საქართველოს დაკვეთით კავკასიის კვლევითი რესურსების ცენტრმა (CRRC) მთელი ქვეყნის მასშტაბით გამოკითხვა ჩაატარა, რომელშიც მონაწილეობა 2 032-მა ადამიანმა მიიღო.

კვლევა 2016 წლის 15-28 მარტს ჩატარდა.