ჩინელი აკრობატი ქალი წარმოდგენის დროს ჩამოვარდა და მალევე გარდაიცვალა, რისი კადრებიც ინტერნეტში მაშინვე გავრცელდა. ქალი აკრობატულ ნომერს თავის ქმართან ერთად ასრულებდა, თუმცა გარკვეულ მომენტში, როცა მას ქმარი იჭერდა, თავის შეკავება ვერ შეძლო, ქმარს დაუსხლტა და ჩამოვარდა.

დაშავებული აკრობატი მაშინვე საავადმყოფოში გადაიყვანეს, თუმცა მისი დაზიანებები იმდენად მძიმე იყო, რომ ექიმებმა ქალის გადარჩენა ვერ შეძლეს. სოციალური ქსელების მომხმარებელმა, რომლებმაც აკრობატი ქალის ჩამოვარდნის ვიდეო ნახეს, იმ ფაქტს გასვეს ხაზი, რომ ქალს დამცავი ღვედი არ ეკეთა და არც სცენა იყო ისე მოწყობილი, რომ ჩამოვარდნის შემთხვევაში აკრობატები დაშავებისგან დაეცვა.

ჩინეთის სოციალური ქსელის, Weibos-ს მომხმარებლები ასევე ითხოვენ, რომ აკრობატულ ინდუსტრიაში უსაფრთხოების რეგულაციები გამკაცრდეს და აკრობატებსაც თავდაცვის ზომების დაცვა მოსთხოვონ.

ფოტო: Courtesy Douyin

"ასეთი აკრობატული წარმოდგენა ძალიან საშიშია. როგორი დახელოვნებულებიც არ უნდა იყვნენ აკრობატები, შეცდომებისგან არავინაა დაზღვეული. როგორ შეიძლება, უსაფრთხოების ზომები არ არსებობდეს?" — ვკითხულობთ კომენტარებში.

ადგილობრივი მთავრობის განცხადებით, გამოძიების შედეგად დადგინდა, რომ აკრობატი ქალის გარდაცვალება უბედური შემთხვევა იყო. კომპანია, რომელიც აკრობატების შოუს მართავდა, გარდაცვლილი ქალის ოჯახს კომპენსაციას გადაუხდის. აკრობატი ცოლ-ქმარი 10 წლის განმავლობაში იყვნენ დაქორწინებულები და მათ 2 შვილი ჰყავთ.