ზოგჯერ ხერხი ღონეს სულაც არ სჯობს: ამაში 47 წლის შოტლანდიელი მორბენალი ზაკრშევსკიც დაგვეთანხმება, რომელიც მარათონიდან მოხსნეს — როგორც აღმოჩნდა, სპორტსმენმა მანჩესტერიდან ლივერპულამდე მარათონში 4 კილომეტრი მანქანით გაიარა.

7 აპრილს გამართულ შეჯიბრებაზე სპორტსმენმა მესამე ადგილი დაიკავა, თუმცა მოგვიანებით მონაცემების შემოწმებისას აღმოჩნდა, რომ მორბენალმა 1 მილი წუთსა და 40 წამში გაირბინა. ამ ფაქტმა ორგანიზატორებს ეჭვი გაუჩინა, საბოლოოდ კი გამოძიებამ დაადგინა, რომ მარათონის ნაწილი სპორტსმენმა ტრანსპორტით გაიარა.

მორბენალის მეგობარმა მედიას განუცხადა, რომ სპორტსმენი შეჯიბრებამდე და შეჯიბრებისას თავს შეუძლოდ გრძნობდა და შეჯიბრებიდან გამოთიშვა უნდოდა. მისი თქმით, მორბენალი მომხდარის გამო ძალიან წუხს და გამოძიებასთანაც ითანამშრომლა.