იტალიის ქალაქ ნეაპოლში მცხოვრებ წყვილს, არმანდოსა და კლარას, 31 მარტს პირველი შვილი შეეძინა. სახელის შერჩევაზე ბევრი არ უფიქრიათ და ბავშვს დანიელე ხვიჩა დაარქვეს — ქართველი ფეხბურთელისა და ნეაპოლის გუნდ ნაპოლის წევრის, ხვიჩა კვარაცხელიას, პატივსაცემად. ინფორმაციას ამის შესახებ იტალიური გამოცემა Spazio Napoli ავრცელებს.

როგორც Spazio Napoli წერს, თავის დროზე დიეგო მარადონას პატივსაცემად ლეგენდარული არგენტინელი ფეხბურთელის სახელი არაერთ ბავშვს დაარქვეს, "2023 წელს კი ისტორია მეორდება".

სხვათა შორის, სწორედ მარადონას პატივსაცემად დაურქმევიათ დანიელე ხვიჩას მამისთვისაც სახელი არმანდო. დღეს კი ნაპოლის მხურვალე გულშემატკივრები, არმანდო და კლარა, ნეაპოლში პირველი მშობლები გახდნენ, რომელთაც შვილს ხვიჩა კვარაცხელიას სახელი დაარქვეს.

"გადაწყვეტილება ერთად მივიღეთ", — ამბობს ახალშობილი დანიელე ხვიჩას მამა, — "ვფიქრობ, ასეთი წელი რომ არ გვქონოდა და ასეთი შესანიშნავი ფეხბურთელი არ გვყოლოდა, მას, უბრალოდ, დანიელე ერქმეოდა".

არმანდო იმასაც ამატებს, რომ მისი ოცნება სწორედ ქართველ ფეხბურთელთან შეხვედრაა.

ფოტო: AFP

22 წლის ქართველმა ნახევარმცველმა ხვიჩა კვარაცხელიამ კარიერა თბილისის დინამოში დაიწყო. სხვადასხვა დროს ის ასევე თამაშობდა რუსთავში, მოსკოვის ლოკომოტივსა და ყაზანის რუბინში. 2022 წელს კვარაცხელია იტალიურ ნაპოლიში გადავიდა, რის შემდეგაც მსოფლიოში იგი "კვარადონას" მეტსახელითაც გაიცნეს.

ბოლო მონაცემებით, ხვიჩა კვარაცხელიას სატრანსფერო ფასი 85 მილიონი ევროა.