ინფორმაციას დე ფაქტო საგარეო საქმეთა სამინისტრო ავრცელებს.

რატომ არის მნიშვნელოვანი: 4-5 აპრილს ჟენევის საერთაშორისო დისკუსიების 57-ე რაუნდი გაიმართა, რომელიც ამიერკავკასიაში უსაფრთხოებისა და სტაბილურობის თემას მიეძღვნა.

  • დისკუსიებს ოკუპირებული რეგიონების, საქართველოსა და რუსეთის წარმომადგენლები, ასევე, აშშ-ის, გაეროს, ევროკავშირისა და ეუთოს თანათავმჯდომარეები ესწრებოდნენ.
  • ჟენევის საერთაშორისო მოლაპარაკებებზე ოკუპირებული აფხაზეთის ე.წ. მთავრობამ აფხაზური პასპორტების აღიარება მოითხოვა.
  • საოკუპაციო რეჟიმს სურს, მიეცეთ აფხაზური პასპორტებით მსოფლიოში გადაადგილების შესაძლებლობა.

დეტალები: აფხაზეთის ე.წ. საგარეო უწყების ცნობით, აფხაზურის პასპორტების აღიარების საკითხი მეორე სამუშაო ჯგუფის ფარგლებში, ჰუმანიტარული საკითხების განხილვისას დააყენეს.

  • "აფხაზურმა მხარემ კიდევ ერთხელ დააყენა საკითხი აფხაზეთის ეროვნული პასპორტების მსოფლიოს გარშემო მოგზაურობის დოკუმენტებად გამოყენების შესაძლებლობაზე. ასევე, განიხილეს განათლების ხელმისაწვდომობის, სამედიცინო მომსახურებისა და რიგი სხვა აქტუალური საკითხები", — ნათქვამია განცხადებაში.
  • დე ფაქტო სამინისტროს თქმით, მათ გალში ინციდენტების პრევენციისა და მათზე რეაგირების მექანიზმის მუშაობის განახლების მზაობაც დაადასტურეს, თუმცა ქართულმა მხარემ უარი განაცხადა.