ამის შესახებ ინფორმაციას შინაგან საქმეთა სამინისტრო ავრცელებს.

რატომ არის მნიშვნელოვანი: უწყების ცნობით, მოსამართლის განჩინების საფუძველზე, კანონიერი ქურდისთვის მიმართვის და ქურდული სამყაროს საქმიანობის მხარდაჭერის ფაქტზე, წარსულში ნასამართლევი სამი პირი დააკავეს, ხოლო ერთ პირს ბრალი დაუსწრებლად წარედგინა.

  • ფაქტებზე გამოძიება საქართველოს სისხლის სამართლის კოდექსის 223-ე მესამე პრიმა მუხლის მე-2 ნაწილით და 223-ე მე-4 პრიმა მუხლის 1-ელი ნაწილით.
  • დანაშაულები 6-დან 15 წლამდე ვადით თავისუფლების აღკვეთას ითვალისწინებს.

დეტალები: შსს-ს განცხადებით, 1989 წელს დაბადებული პირი, მეტსახელად ზაკუნა დაკავებულია კანონიერი ქურდისთვის მიმართვის ბრალდებით.

  • ხოლო 1981 წელს დაბადებული, მეტსახელად ჩაქუჩიჩი და 1995 წელს დაბადებული პირი სამართალდამცველებმა ქურდული სამყაროს საქმიანობის მხარდაჭერისთვის დააკავეს.
  • რაც შეეხება 1979 წელს დაბადებულ, წარსულში ნასამართლევ, მეტსახელად ტაისონას, უწყების ცნობით, მას კანონიერი ქურდისთვის მიმართვის ფაქტზე ბრალი დაუსწრებლად წარედგინა.
  • განმარტავენ, რომ ორ პირს შორის ფინანსური ვალდებულების შეუსრულებლობის ნიადაგზე წარმოიშვა დავა, რის გამოც ერთ-ერთმა ფიზიკური შეურაცხყოფა მიაყენა კონფლიქტში ჩართულ მეორე პირს.
  • ამბობენ, რომ მან კანონიერ ქურდს მიხეილ ჩაფიჩაძეს, მეტსახელად მაჩვიჩს მიმართა, რომლის გადაწყვეტილებით,მხარეებმა და მათმა თანმხლებმა პირებმა საპასუხოდ მიაყენეს ფიზიკური შეურაცხყოფა.
  • "მოდავე მხარეებს შორის არსებული კონფლიქტის ქურდული კანონების თანახმად მოგვარების მიზნით, საზღვარგარეთ მყოფმა კანონიერმა ქურდმა, ჯეირან კინწურაშვილმა თურქეთის რესპუბლიკაში მოაწყო ქურდული გარჩევა და მხარეების შერიგების თაობაზე მიიღო გადაწყვეტილება", — ნათქვამია განცხადებაში.
  • მათი განცხადებით, ქურდულ სამყაროსთან კავშირის ბრალდებით დაკავებული და კანონიერი ქურდისთვის მიმართვის ფაქტზე ბრალწარდგენილი პირები აქტიურად მონაწილეობდნენ ქურდული სამყაროს საქმიანობის განხორციელებაში.
  • "პირადი კონფლიქტებისა თუ ფინანსური დავების ქურდული წესებით გადაწყვეტისთვის უკავშირდებოდნენ კრიმინალურ ავტორიტეტებს, აგრეთვე, საზღვარგარეთ მყოფ ქართველ კანონიერ ქურდებს და მათგან მითითებებს იღებდნენ", — წერს შსს.
  • მათივე ცნობით, ნივთმტკიცებად ამოღებულია კომპიუტერული ტექნიკა და ბრალდებულების მობილური ტელეფონები, რომელთა საშუალებითაც ისინი ერთმანეთს უკავშირდებოდნენ, ასევე ნივთმტკიცებად ამოღებულია სხვადასხვა სახის ნარკოტიკული საშუალებები.