წნორში არსებულ სოციალურ საწარმოს, ცოდნის კაფეს, ამ დროისთვის დაკავებული სივრცის აგვისტოდან დატოვება უწევს. მას თავისი საკუთარი სივრცე ამ დროისთვის არ გააჩნია და ქირაში ყოველთვიურად 1 000 ლარს იხდის.

ცოტა ხნის წინ, ორგანიზატორებმა, ცოდნის კაფესთვის ფულის შეგროვება დაიწყეს, რითიც ჯერ მიწის შეძენას და შემდეგ მასზე მშენებლობის დაწყებას გეგმავენ.

"27 ივნისამდე მოსაგროვებელი გვაქვს $17 000 მიწის შესაძენად, რომელზეც ავაშენებთ ყველას ცოდნის კაფეს. მშენებლობის ხარჯები კი, საშუალოდ, 25 ათას დოლარს შეადგენს. ლარის და დოლარის ანგარიში: GE56BG0000000228253800, მიმღები: ააიპ ცოდნის კაფე" - წერია ცოდნის კაფეს ფეისბუკის გვერდზე.

2016 წლიდან დღემდე, ცოდნის კაფემ 90-ზე მეტ დისკუსიას, ტრენინგს, კინოჩვენებას და ვორქშოფს უმასპინძლა, მათ 2 000-ზე მეტი მონაწილე დაესწრო.

კაფე სულ ოთხ კომპონენტს აერთიანებს

  • მულტიმედია ბიბლიოთეკას;
  • კაფეს;
  • წიგნების მაღაზიას;
  • არაფომალური განათლების ცენტრს.

ცოდნის კაფეს მისიაა - ახალი ცოდნებისა და გამოცდილებების გენერირება ცენტრიდან რეგიონებისკენ.