ამ თემაზე პრემეირმინისტრმა პარლამენტში ისაუბრა.

რატომ არის მნიშვნელოვანი: ღარიბაშვილი საკანონმდებლო ორგანოში ქვეყნის უსაფრთხოების გამოწვევებზე სასაუბროდ მივიდა.

• მიუხედავად იმისა, რომ გამოსვლამდე დეპუტატმა, თეონა აქუბარდიამ მოუწოდა მას, ესაუბრა რეალურ საფრთხეებზე და არა პროპაგანდისტულ ნარატივებზე, ის ასე არ მოქცეულა.
• ტრადიციული რიტორიკისგან განსხვავებით, პრემიერმინისტრი ახსენებს რუსეთს, მაგრამ არა როგორც ქვეყანას, რომლისგანაც პირდაპირი საფრთხე მოდის — უფრო მეტ დროს ის უკრაინისა და ოპოზიციისგან მომავალ "საფრთხეებზე" საუბარს უთმობს.
• მის ჩამონათვალში ომში ჩათრევის მცდელობებსა და სარფთხისშემეცველ 4 პროცესებში მოხვდა სააკაშვილის ჩამოსვლა, უკრაინაში წამსვლელი მოხალისე მებრძოლებისთვის გაფრენის უფლების განხილვა, აქციები #შინევროპისკენ და 8-9 მარტს რუსული კანონის საწინააღმდეგო პროტესტი.
• პრემიერმინისტრმა სცადა, რომ ეს აქციები ძალადობრივად და მთავრობის გადატრიალების გეგმად წარმოეჩინა.
• ამავე ტრიბუნიდან, სადაც პოლარიზაციაში სხვას დასდო ბრალი, ღარიბაშვილმა ოპოზიციას ისევ უწოდა დესტრუქციული, რუსული კანონის საწინააღმდეგო აქციის მონაწილეებს კი ძალადობრივი და ანარქისტული.
• ღარიბაშვილს სამოქალაქო საზოგადოებამ არაერთგზის განუმარტა და მოუწოდა არ გამოიყენოს სიძულვილის ენის შემცველი რიტორიკა და არ წაახალისოს პოლარიზაცია და აგრესია ოპონენტების, მედიის და აქტივისტების მიმართ.

დეტალები: ღარიბაშვილის თქმით, ევროპელ პარტნიორებს ბევრჯერ უთხრა, რომ საქართველოსთვის კანდიდატის სტატუსის არმიცემა შეცდომა იყო.

• "ვინაიდან ჩვენი პროგნოზით და ეს პროგნოზი სახეზეა, რომ გაცხადდა, ახდა — პოლარიზაცია არასდროს დასრულდებოდა, არამედ მოიმატებდა ქვეყანაში. ჩვენ რომ შევხედოთ ერთი წლის განმავლობაში, შემცირდა თუ არა პოლარიზაცია. ალბათ, ვერავინ ვერ დაგვეთანხმება, რომ ეს ასე მოხდა. პირიქით", — ამბობს ის და პოლარიზაციის ზრდის მიზეზად ევროკომისიის გადაწყვეტილების წარმოჩენას ცდილობს.
• ამის შემდეგ კი საუბარს დესტაბილიზაციის მცდელობებზე აგრძელებს და ისევ ახსენებს შარშანდელ #შინევროპისკენ და წლევანდელ მარტის აქციებს რუსული კანონის წინააღმდეგ.
• "შესაბამისად, ჩვენი პასუხი საჯაროდ მინდა ვთქვა, რაც მე გავუზიარე ღიად ჩვენს ევროპელ პარტნიორებს არის შემდეგი: თუ ევროპას, ჩვენს ევროპარლამენტარებს და კოლეგებს რეალურად სურთ პოლარიზაციის დასრულება, მათ უნდა მიანიჭონ კანდიდატის სტატუსი. ეს მოხსნის ყოველგვარ კითხვებს, სპეკულაციებს დაასრულებს მათ რადიკალურ და დესტრუქციულ მოქმედებებს", — განაცხადა მან.
• იქვე გაიმეორა ისიც, რომ კანდიდატის სტატუსი სიმბოლური, მაგრამ მნიშნველოვანი გადაწყვეტილებაა და მათი ხელისუფლება ყველაფერს აკეთებს ამ მიმართულებით.
• "დარჩენილი არის ერთადერთი შესასრულებელი ვალდებულება, რომელიც უკავშირდება პოლარიზაციის ვალდებულებას და ეს არის ერთობლივად შესასრულებელი, მთავრობის, ხელისუფლების, პარლამენტის და ოპოზიციის", — აღნიშნა მან.
• ამის შემდეგ კი ისევ პირდაპირ ოპოზიციაზე თავდასხმით განაგრძო და მათ "ყველაზე ანტიევროპული" და "ანტიეროვნული" ძალა უწოდა.