ახალზელანდიელი მწერლის ჰიზერ მორისის მსოფლიო ბესტსელერის, აუშვიცის ტატუისტის, მიხედვით სერიალს გადაიღებენ. ნამდვილ ამბავზე დაფუძნებული ისტორიული რომანის ეკრანიზაციის რეჟისორი ტალი შალომ-ეზერია. სერიალში მთავარ როლებს ჯონა ჰაუერ-კინგი და ანა პროჩნიაკი შეასრულებენ.

ფოტო: Getty Images

ფოტო: Aleksander Ikaniewicz

აუშვიცის ტატუსტი 2018 წელს გამოიცა და მალევე იქცა ბესტსელერად. რომანი მსოფლიოში ათობით ენაზე ითარგმნა (მათ შორის, ქართულად) და დღემდე 12 მილიონზე მეტ ეგზემპლარად გაიყიდა.

წიგნი აუშვიც-ბირკენაუს საკონცენტრაციო ბანაკში განვითარებულ რეალურ ისტორიას ჰყვება. ნაცისტების სიკვდილის ბანაკში მოხვედრილი სლოვაკი ებრაელი ლალე სოკოლოვი მიზნად დაისახავს, ტყვეობას ცოცხალი გადაურჩეს და ამისთვის აუშვიცის ტატუისტიც კი ხდება. იგი მასავით ბანაკის ტყვეებს მკლავზე საიდენტიფიკაციო ნომერს აწერს. სწორედ ასე ხვდება ლალე თავისი ცხოვრების სიყვარულს, გიტას, და მისი მიზანი უკვე საყვარელი ადამიანის სიცოცხლის გადარჩენაც ხდება.

ჰოლოკოსტს გადარჩენილმა ლალე სოკოლოვმა გარდაცვალებამდე არცთუ დიდი ხნით ადრე თავისი ისტორია ჰიზერ მორისს პირადად მოუყვა და სთხოვა, მასზე დაეწერა.

"აუშვიცში, სიკვდილისა და გაარაადამიანურების ქარხანაში, ლალესა და გიტას სიყვარული თავდაცვის საშუალებად იქცა", — აღნიშნავს სერიალის რეჟისორი შალომ-ეზერი, — "აქ შენს არჩევანზე იყო დამოკიდებული, დარჩებოდი თუ არა ადამიანად. ამ ამბით შთაგონებული ვარ და მსურს, ის ეკრანზე გავაცოცხლო ნიჭიერ ადამიანებთან ერთად".