რუსეთის ცენტრალური საარჩევნო კომისიის თავმჯდომარემ, ელა პამფილოვამ განაცხადა, რომ რუს ოპოზიციონერ ალექსეი ნავალნის საპრეზიდენტო არჩევნებში დარეგისტრირების შანსი არ აქვს. ამის შესახებ პამფილოვამ ტელეკომპანია დოჟდის ეთერში განაცხადა.

ცესკოს თავმჯდომარეს კონკრეტული სახელები არ დაუსახელებია, თუმცა ინტერვიუს დროს ისაუბრა ადამიანებზე, რომლებიც "მუდმივად იფიქრებენ ახალ პროვოკაციებს", რომლებიც "არა მხოლოდ რეჟიმის, არამედ ქვეყნის მტრები არიან."

ნავალნიზე საუბრისას კი თქვა: "მე მესმის და მასაც ესმის, რომ ნასამართლეობის გამო არ აქვს შანსი არჩევნებზე დარეგისტრირების."

რუსი ოპოზიციონერი პოლიტიკოსი, ალექსეი ნავალნი თავისი ანტიკორუფციული კამპანიის გამოა ცნობილი. მიუხედავად იმისა, რომ ის რამდენჯერმე დააკავეს და თავსაც დაესხნენ, ნავალნი 2018 წლის საპრეზიდენტო არჩევნებში აპირებს კენჭის ყრას.